මහනුවර හා කොළඹ වායු දූෂණය WHO නිර්දේශ මට්ටම් ඉක්මවයි

කොළඹ හා මහනුවර නගර බල සීමා හැරුණු කොට අප රටේ සෙසු ප්‍රදේශ සියල්ලම වායු දූෂණයෙන් අවම මට්ටමක පවතී. එහෙත් කොළඹ හා මහනුවර නගර ආශ්‍රිතව පවතින වායු දූෂණ මට්ටම ලෝක සෞඛ්‍ය සංවිධානය විසින් කර ඇති නිර්දේශිත මට්ටම  පවා ඉක්මවා ගොස් ඇති බවට හෙළි වී ඇතැයි පරිසර අමාත්‍ය මහින්ද අමරවීර මහතා පැවසීය.

අමාත්‍යවරයා මෙම අදහස් පළ කළේ අද (23) පෙරවරුවේ කොළඹ ශ්‍රී ලංකා වෛද්‍ය සභාව විසින් සංවිධානය කරන ලද මාධ්‍ය සම්මන්ත්‍රණයකට සහභාගි වෙමිනි. එම සංගමයේ සභාපතිනි විශේෂඥ වෛද්‍ය පද්මා ගුණරත්න, විශේෂඥ වෛද්‍ය කමණි ගුරුගේ, ජ්‍යෙෂ්ඨ පරිසරවේදී නීතිඥ ආචාර්ය ජගත් ගුණවර්ධන යන මහත්වරු ද සහභාගි වි සිටියහ.

මෙහිදී අදහස් පළ කළ අමාත්‍යවරයා වායු ගෝලයේ ක්ෂුද්‍ර අංශු වර්ග මීටරයකට මයික්‍රෝ ග්‍රෑම් 50කට අඩු මට්ටමක පැවැතිය යුතු යැයි ලෝක සෞඛ්‍ය සංවිධානයේ නිර්දේශයයි. එහෙත් ඇතැම් අවස්ථාවල දී මෙම තත්ත්වය කොළඹ හා මහනුවර දිස්ත්‍රික්කවල 150-165 දක්වා ඉහළ යන අවස්ථා පවතී. විශේෂයෙන්ම මහනුවර නගරය කඳුයායකට මැදිව පවතින නගරයක් බැවින් එහි වායුගෝලයේ පවතින ක්ෂුද්‍ර අංශ ඉවතට ඇදී යාමක් සිදු නොවේ.

එමෙන්ම කොළඹ නගරය ආසන්නයෙන්ම සාගරය පවතින බැවින් හමා එන සුළං නිසා ක්ෂුද්‍ර අංශ මෙම වායු ගෝලයේ රඳා පැවැතීමක් ද සිදු නොවේ.නමුත් ඇතැම් අවස්ථාවල දී ඉන්දියාවේ සිට හමා එන සුළං දහරාවන් සමග එහි වායු ගෝලයේ ක්ෂුද්‍ර අංශ කොළඹ නගරයට බලපෑමක් එල්ල කර තිබේ. වායු දූෂණයෙන් සියයට 65කටම වගකිව යුත්තේ වාහනවලින් නිකුත් කරන දුම් බැවින් කොළඹ නගරයේ හා මහනුවර දිස්ත්‍රික්කය මෙන්ම කුරුණෑගල හා ගාල්ල නගර සීමාවල ද තත්ත්වය ක්‍රමයෙන් නරක අතට හැරෙමින් පවතී.

එමනිසා කොවිඩ් 19 අවසන් වුවත්, මහනුවර නගරයේ දරුවන් හා වැඩිහිටියන්ට මුව ආවරණ පැළඳ සිටිය යුතු තත්ත්වයක් පැන නැගී පවතින බව ද අමාත්‍යවරයා සඳහන් කළේය.

එම නිසා ඉදිරි අයවැය ලේඛනයේ දී මෙරටට වාහන ආනයනය කිරීමට අවසර දෙන්නේ  නම් විදුලි බලයෙන් හා සුර්ය බලයෙන් ක්‍රියාත්මක වන වාහන ආනයනය සඳහා ප්‍රමුඛත්වය ලබා දීමට රජයේ අවධානය යොමු කිරීමටත්, වායු තත්ත්වයන් මනින ස්ථාන දැනට පවතින්නේ  ස්ථාන දෙකක පමණක් නිසා එම ස්ථාන සංඛ්‍යාව 10 දක්වා වැඩි කිරීමටත් පියවර ගන්නා බව අමාත්‍යවරයා පැවසීය.

එමෙන්ම ඇතැම් පුද්ගලයින් විසින් සිදු කරන වන විනාශයන් සම්බන්ධව අදහස් පළ කළ අමාත්‍යවරයා වන විනාශයන් සම්බන්ධයෙන් සමාජ මාධ්‍ය තුළ පළවන අසත්‍ය කරුණු නිසා සත්‍ය කරුණු යට යන බවත්, එමගින් විශාල හානියක් සමාජයට සිදු වන බවත් කීය. විදේශ රටවල සිදුවන කැළෑ කැපීම්, ගස් කැපීම්වල ඡායාරූප ඇතුළත් කර ඒවා ශ්‍රී ලංකාවේ සිදුවන බවට ඇතැම් ප්‍රසිද්ධ මාධ්‍යවේදීන් පවා මුහුණු පොතට ඇතුළත් කර ඇති බවද ඔහු පැවැසීය.

අප රටේ නොවැඩෙන ඕක් ගස් පවා කපන දර්ශන ඇතුළත්  ඡායාරූප සිංහරාජයේ වන විනාශයන් ලෙස දක්වා ඇති බවත් එමෙන්ම ඇමසන් වනාන්තරයේ සිදු කරන පරිසර හානි සිංහරාජයේ සිදුවන පරිසර හානි ලෙස ද දක්වා අදහස් පළ කර ඇති බවත් ඔහු පැවැසීය.

මෙවැනි කටයුතුවලින් වළකින ලෙසත් සැබෑ පරිසර හානි පෙන්වා දෙන ලෙසත් අමාත්‍යවරයා ඉල්ලා සිටියේය. කෙසේ වුවද මේ රටේ පරිසර හානි කිරීමට කටයුතු කරන පුද්ගලයින් රැසකට මේ වනවිටත් රජය විසින් නීතිමය පියවර ගෙන ඇති බවත්, සිංහරාජයේ අනවසර ඉදි කිරීමක් සම්බන්ධව මේ දිනවල පවතින කතිකාවට අදාලව තමන් විස්තර සහිත වාර්තාවක් ලබා දෙන ලෙස මධ්‍යම පරිසර අධිකාරියට උපදෙස් දී තිබෙන බව ද හෙතෙම කීය.