මරණ තර්ජන කළ වෛද්‍යවරියගේ දියණිය කොන්දේසි විරහිතව සමාව ගැනීමට සූදානම්

අල්ලස් කොමිසමේ නිලධාරීන්ට මරණීය තර්ජන එල්ල කිරීම සම්බන්ධයෙන් එම නිලධාරීන්ගෙන් කොන්දේසි විරහිතව සමාව අයැදීමට සූදානම් බව ස්නායු ශල්‍ය උපකරණ වැඩි මිලට විකුණුවේ යැයි කියන ශ්‍රී ජයවර්ධනපුර රෝහලේ විශේෂඥ ස්නායු ශල්‍ය වෛද්‍යවරියගේ දියණිය කොළඹ ප්‍රධාන මහේස්ත්‍රාත් තනූජා ලක්මාලී මහත්මියට අද (05) දැනුම් දුන්නාය.

සමාව අයැදු බවට පුවත්පත්වල දැන්වීම් පළකිරීමටද තමන් සූදානම් බවත්, තමන්ට එරෙහි විමර්ශනය සමථයකට පත්කර තමාගේ අනාගතය සකසා ගැනීමට ඉඩ සළසා දෙන්නැයි සැකකාර හේමාලී විජේරත්න මෙනවිය අධිකරණයෙන් ඉල්ලා සිටියාය.

අල්ලස් කොමිසමේ නිලධාරීන්ට මරණීය තර්ජන එල්ල කිරීම සම්බන්ධයෙන් ඇප මත මුදාහැර සිටින හේමාලී විජේරත්න මෙනවිය ජනාධිපති නීතිඥ උපුල් කුමරප්පෙරුම මහතා මඟින් මෙම කරුණු අධිකරණයට ඉදිරිපත් කළාය.
අල්ලස් කොමිසමේ නිලධාරීන් දෙපළගෙන් අධිකරණය ඉදිරියේදී කොන්දේසි විරහිතව සමාව ගෙන නඩුව සමථයකට පත් කිරීමට සැකකාරිය සූදානම් නමුත්, මේ අවස්ථාවේදී අදාළ චෝදනාවන්ට වරද පිළිගැනීමේ හැකියාවක් නොමැති බවද නීතිඥවරයා වැඩිදුරටත් පැවසීය.

රජයේ ප්‍රසම්පාදන ක්‍රියාවලියෙන් තොරව ශ්‍රී ජයවර්ධනපුර රෝහලේ ප්‍රතිකාර ලැබූ නේවාසික රෝගීන්ට ස්නායු ශල්‍ය උපකරණය වැඩි මිලට විකිණීමෙන්, දූෂණය නම් වරද කරන ලදැයි කියන විශේෂඥ වෛද්‍ය මහේෂි විජේරත්න මහත්මිය මීට පෙර අවස්ථාවක රක්ෂිත බන්ධනාගාර ගත කළ අවස්ථාවේ කොළඹ මහේස්ත්‍රාත් අධිකරණය පරීශ්‍රයේදී හේමාලී විජේරත්න නමැත්තිය අල්ලස් කොමිසමේ නිලධාරීන්ට මරණ තර්ජනය කිරීමට අදාළ පැමිණීල්ල කැඳවූ අවස්ථාවේදී මෙම කරුණු ඉදිරිපත් කළේය.

සැකකාර හේමාලී විජේරත්න මෙනවිය වෙනුවෙන් නීතිඥ කනිල් මද්දුමාගේ මහතා ඉදිරිපත් කළ මෝෂමකට අනුව නඩුව කැඳවු අවස්ථාවේදී ජනාධිපති නීතිඥ උපුල් කුමරපපෙරුම මහතා කරුණු දක්වමින් බි්‍රතාන්‍යයේ විශ්ව විද්‍යාලයක ශිෂ්‍යාවක වන තම සේවාදායිකාවට විදේශීය අධ්‍යාපනය සඳහා එම විශ්ව විද්‍යාලයට යෑමට ඇති බැවින් විමර්ශනය සමථයකට පත්කර ඒ සඳහා ඉඩ ලබා දෙන්නැයි ඉල්ලා සිටියේය.

21 හැවරදි වියේ පසුවන ලාබාල තැනැත්තියක් වන සැකකාරියට ලබන 13 වැනිදා අධ්‍යාපනය හැදෑරීම සඳහා එංගලන්තයට යෑමට ඇති බවත්, එසේ නොගියහොත් ඇගේ මුළු ජීවිත කාලයම අඳුරට පත්වන බවත් පෙන්වා දුන් ජනාධිපති නීතිඥ උපුල් කුමරපපෙරුම මහතා ලාබාල තැනැත්තියක් වන තම සේවාදායිකාවට එරෙහිව මරණීය තර්ජන එල්ල කිරීම සම්බන්ධයෙන් වූ  විමර්ශනය සුදුසු කොන්දේසියක් යටතේ සමථයකට පත් කිරීමට අවශ්‍ය කටයුතු කරන්නැයිද ඉල්ලා සිටියේය.

සැකකාරිය ලාබාල තැනැත්තියක් බැවින් ,අධිකරණයේ ඉදිරියේ කොන්දේසි විරහිතව සමාව අයදීමෙන් පසුව විමර්ශනය සමථයකට පත් කිරීමට හැකියාව ඇත්දැයි සලකා බලන ලෙසත්, ඉදිරි අධ්‍යාපන කටයුතු සඳහා ලබන 13 වැනිදා එංගලන්ත විශ්ව විද්‍යාලයට ඇතුළත් වී දිගටම අධ්‍යාපනය හැදෑරිය යුතු බැවින් ලබන 27 වැනිදා පැවැත්වීමට දින නියම කර ඇති විමර්ශනය සඳහා තම සේවාදායිකාවට අධිකරණයේ පෙනී සිටීමට හැකියාවක් නැති බැවිත් අල්ලස් කොමිසමේ ස්ථාවරය ඊට පෙර දැනුම් දෙන්නැයි නීතිඥවරයා ඉල්ලා සිටියේය.

අල්ලස් කොමිසමේ නිලධාරීන් කරුණු ඉදිරිපත් කරමින් නඩුව සමථයකට පත් කරනවාද? නැතහොත් චෝදනා ගොනු පත්‍රයක් කරනවාද? යන්න සම්බන්ධයෙන් අල්ලස් කොමිසමේ ස්ථාවරය අධ්‍යක්ෂ ජනරාල්වරයාගේ උපදෙස් මත ඉදිරි දිනයකදී අධිකරණයට ඉදිරිපත් කිරීමට හැකි බව දන්වා සිටියේය.

ඉදිරිපත් වූ කරුණු සලකා බැලූ ප්‍රධාන මහේස්ත්‍රාත්වරිය සැකකාරියට එරෙහිව චෝදනා පත්‍රය ගොනු කරන්නේද? නැතහොත් සැකකාර පාර්ශවය ඉල්ලා සිටින කොන්දේසි මත නඩුව සමථයකට පත්කරන්නේද? යන්න පිළිබඳ අල්ලස් කොමිසමේ ස්ථාවරය ලබන 07 වැනිදා අධිකරණයට දැනුම් දෙන නියෝග කළාය.

අල්ලස් කොමිසමේ නිලධාරීන්ට මරණ තර්ජන එල්ල කිරීම සම්බන්ධයෙන් දණ්ඩ නිතී සංග්‍රහය යටතේ සැකකාරියට එරෙහිව කෙසෙල්වත්ත පොලිසිය විසින් පවත්වන පැමිණීල්ල ඉන් අනතුරුව කැඳවිණි.

ඒ අවස්ථාවේදී කෙසෙල්වත්ත පොලිස් නිලධාරීන් ඇමතූ මහේස්ත්‍රාත්වරිය විමර්ශනය සම්බන්ධයෙන් පොලිසියේ ස්ථාවරය කුමක්දැයි විමසා සිටියාය.

ඊට ප්‍රතිචාර දැක්වූ පොලිස් නිලධාරීන් සැකකාරිය විසින් අදාළ චෝදනාවන්ට වරද පිළිගන්නේ නම් ඉදිරි දිනයේදී චෝදනා පත්‍රයක් ගොනු කළ හැකි බව දන්වා සිටියේය.

ජනාධිපති නීතිඥ උපුල් කුමරප්පෙරුම මහතා කරුණු දක්වමින් චෝදනාවන්ට වරද පිළිගැනීමට සැකකාරියට මේ අවස්ථාවේදී නොහැකි බව පැවසීය. ඉදිරිපත් වූ කරුණු සලකා බැලූ ප්‍රධාන මහේස්ත්‍රාත්වරිය පැමිණිල්ලද ලබන 13 වැනිදා කැඳවීමට නියම කළාය.