මධ්‍යම ආසියායු සමුළුව 18 දා චීනයේදී

මධ්‍යම ආසියා සමුළුව එළඹෙන 18 වැනිදා චීනයේ දී ආරම්භ වීමට නියමිතය.  මෙය චීනයේ පැවැත්වෙන පළමු වතාව වන අතර මේ සඳහා මධ්‍යම ආසියානු රටවල් 5ක නායකයින් සහභාගි වීමට නියමිතය. සමුළුව චීනයේ ශාංෂි ප්‍රාන්තයේ ෂියෑන් හිදී ආරම්භ වීමට මේ වන විටත් කටයුතු සූදානම් කර ඇත.

සමුළුව දෙදිනක් පැවැත්වීමට නියමිත අතර, මෙවර සමුළුව චීනයේ ජනාධිපති ෂී ජිංපිං මහතාගේ ප්‍රධානත්වයෙන් පැවැත්වේ. මෙහිදී චීන ජනාධිපතිවරයා විසින් ප්‍රධාන දේශනය ද පැවැත්වීමට නියමිතය.

මේ සඳහා කසකස්ථාන්, කිරිගිසිස්ථාන්, තජිකිස්ථාන්, උස්බෙකිස්තාන්, ටර්ක්මෙනිස්තානය යන රටවල ජනාධිපතිවරුන් සහභාගී වීමට නියමිතය. මෙය මෙම වසරේ මෙහි පැවැත්වෙන පළමු රාජ්‍යතාන්ත්‍රික උත්සවය වන අතර , එහිදී මෙම රටවල් සඳහා වැදගත් වන ගිවිසුම් කිහිපයක් ද අත්සන් කිරීමට නියමිත බව වාර්තා විය.
මෙම සමුළුවෙන් පසු මෙම රටවල ජනාධිපතිවරුන් සඳහා චීනයේ රාජ්‍ය සංචාරයක් ද සැලසුම් කර ඇත. 

මෙම රටවල් සමඟ වසර 31 කට පෙර රාජ්‍ය තාන්ත්‍රික සබඳතා ආරම්භ කර ඇති අතර, ඉන් පසු පැවැත්වෙන පළමු ඉහළ පෙළේ රැස්වීම මෙම සමුළුව වන අතර එය ආසියානු රටවල් අතර ආර්ථික හා රාජ්‍ය තාන්ත්‍රික සබඳතා ශක්තිමත් කිරීම අරමුණු කර ගෙන තිබේ.

නවෝද්‍යා පවනි (චීනයේ සිට)