බීමත්ව රිය ධාවනය කළ ලංගම රියදුරු අල්ලයි, රියදුරු අසුන පසුපස කසිප්පු කෑන් එකක්

වැලිමඩ සිට නුවරඑලිය හරහා ධාවනය කල ලංගම බස් රථයේ රියදුරු නුවරඑලිය පොලිසියේ රථවාහන අංශයේ නිලධාරින් විසින් (03) දින අත්අඩංගුවට ගෙන ඇත.

දිවුලපිටිය ඩිපෝවට අයත් එම ලංගම බස් රථය ධාවනය කරවන අවස්ථාවේ නුවරඑලිය බදුල්ල ප්‍රධාන මාර්ගයේ සීතා ඇලිය ප්‍රදේශයේ රාජකාරියේ නිරතව සිටි නුවරඑලිය පොලිසියේ රථා වාහන අංශයේ නිළධාරින් බස් රථය නතර කර පරික්ෂා කිරිමේදි රියදුරා අධික ලෙස බීමත්ව සිටින බවට තහවුරු වූ නිසා බස් රථයේ රියදුරා සැකපිට අත්අඩංගුවට ගෙන ඇත.

බස් රථයේ රියදුරා අත්අඩංගුවට ගන්නා අවස්ථාවේ විශාල මගීන් සංඛ්‍යාවක් ගමන් කර ඇති අතර, පසුව නුවරඑලිය පොලිසියේ නිළධාරියෙකු විසින් මගීන් සමග බස් රථය නුවරඑලිය පොලිසිය වෙත රැගෙනවිත් පරික්ෂා කිරිමේදි බස් රථ රියදුරාගේ අසුන පිටුපස නීතිවිරෝධි මත් පැන් (කසිප්පු) සහිත කෑන් එකක් තිබි පොලිස් නිළධාරින් විසින් සොයා ගෙන ඇත.

බස් රථය ධාවනය කරවන අවස්ථාවේ වතුර බොන මුවාවෙන් රියදුරා මත් පැන් පානය කරමින් බස් රථය ධාවනය කරවන බවට පොලිසිය සැකකරයි.

එම ඩිපෝවේ වෙනත් රියදුරෙකු නුවරඑලිය වෙත කැදවා බස් රථයේ සිටින මගීන්ව ගමනාන්තය දක්වා රැගෙන යන ලෙසට නුවරඑලිය පොලිසියේ රථාවහන අංශයේ නිළධාරින් විසින් බස් රථයේ කොන්දොස්තරවරයාට උපදෙස් ලබා දී ඇත.

අත්අඩංගුවට ගත් බස් රථයේ රියදුරා නුවරඑලිය මහේස්ත්‍රාත් අධිකරණය වෙත ඉදිරිපත් කිරිමට නියමිතය.