පොලීසිය ගැන පොලීසියෙන්ම විමර්ශනයක්

මිනිස් ජාවාරමකට සම්බන්ධ සැකකරුවෙකු හැටන් මහේස්ත්‍රාත් අධිකරණය වෙත ඉදිරිපත් කර අධිකරණ වෙත සැකකරු පිලිබද නිසි කරුණු ඉදිරිපත් නොකරමින් සැකකරුට ඇප ලබා දීම සම්බන්ධයෙන් හැටන් කොට්ඨාශ විශේෂ අපරාධ විමර්ශණ අංශයේ නිළධාරින්ට එරෙහිව විමර්ශණයක් ආරම්භ කරන බව හැටන් කොට්ඨාශ භාර පොලිස් අධිකාරි ප්‍රදිප් වීරසේකර මහතා පැවසිය.

සැකකරු මැදපෙරදිග රටවල විවිධ රැකියා ලබා දෙන බවට පොරොන්දු වී හැටන්, නුවරඑලිය යන ප්‍රදේශවල පුද්ගලයන් රැසකගෙන් රු.ලක්ෂ 12 සිට රු.ලක්ෂ 15 දක්වා මුදල් ලබා ගෙන ඉන් කිහිප දෙනෙකු මැද පෙරදිග රටවලට දින කිහිපයකට පමණක් වීසා ලබා දි එම රටවලට යොමු කිරිමෙන් පසු එම රටවලින් එම පිරිස ආපසු මෙරටට එවා ඇත.

මිනිස් ජාවාරම සිදු කල පුද්ගලයා සම්බන්ධයෙන් හැටන් ප්‍රදේශයේ තරුණයන් පිරිසක් හැටන් කොට්ඨාශයේ විශේෂ අපරාධ විමර්ශණ අංශය වෙත කිහිප වතාවක් පැමිණිලි කිරිමට එම අංශය භාර ස්ථානාධිපතිවරයා එම පැමිණිලි භාර නොගෙන එම පැමිණිලි කොළඹ අපරාධ විමර්ශණ අංශය වෙත ගොස් පැමිණිලි කරන ලෙස දන්වා ඇත.

අගතියට පත් හැටන් ප්‍රදේශයේ තරුණයන් පිරිස කදුරුවෙළ ප්‍රදේශයට ගොස් සැකකරු සොයා ගෙන ඒ පිලිබදව පොළොන්නරුව පොලිසිය වෙත ගොස් සැකකරු පිලිබදව තොරතුරු ලබා දීමෙන් පසු පොළොන්නරුව පොලිසියේ නිළධාරින් විසින් සැකකරු පොලිසිය වෙත කැදවා හැටන් පොලිසියේ කොට්ඨාශ අපරාධ විමර්ශණ අංශය වෙත යන ලෙසට දැනුම් දී ඇත.

ඒ අනුව සැකකරු ඔහුට අයත් මෝටර් රථයකින් (27) දින හැටන නගරය වෙත පැමිණ මෝටර් රථය හැටන් දුම්රිය ස්ථානයේ ගාල් කර සැකකරු පොලිසිය වෙත ගොස් භාර වීමෙන් පසු මිනිස් ජාවාරම් සම්බන්ධයෙන් නෝර්ටන්බ්‍රිජ් ප්‍රදේශයේ  පුද්ගලයෙකු විසින් කොට්ඨාශ විශේෂ අපරාධ විමර්ශණ අංශය වෙත කරන ලද පැමිණිල්ලක් මත සැකකරු අත්අඩංගුවට ගෙන (28) දින 67538/25 බී වාර්ථාව මගින් හැටන් මහේස්ත්‍රාත් අධිකරණ වෙත ඉදිරිපත් කිරිමෙන් අනතුරුව සැකකරු ශරීර ඇප මත මුදාහැර යලිත් මෙම නඩුව 9/30 දින කැදවීමට මහේස්ත්‍රාත්වරයා නියෝග කර ඇත.

හැටන් කොට්ඨාශ විශේෂ අපරාධ විමර්ශණ අංශයේ ස්ථානාධිපතිවරයා හැටන් දික්ඔය ප්‍රදේශයේ රියදුරෙකුට සැකකරු පැමිණි වාහනයේ යතුර සහ සැකකරුගේ බිරිදගේ ලිපිනය සහ දුරකථන අංකය ලබා දී කදුරුවෙළ ප්‍රදේශයට ගොස් සැකකරුගේ බිරිදව රැගෙන එන ලෙසට කල දැනුම්දීමක් මත එම රියදුරා කදුරුවෙළ ප්‍රදේශයට ගොස් සැකකරුගේ බිරිදව (28) දින හැටන් නගරයට රැගෙන විත් ඇත්තේ සැකකරුට ඇප ලබා දීමට කිසිවෙක් හැටන් ප්‍රදේශයෙන් ඉදිරිපත් නොවූ නිසාය.

සැකකරු මුදල් ලබා ගැනිම සම්බන්ධයෙන් හැටන් කොට්ඨාශ විශේෂ අපරාධ විමර්ශණ අංශය මගින් පැමිණිලි භාර නොගැනීම සහ භාර ගෙන තිබූ පැමිණිල්ලකට සැකකරු අධිකරණ වෙත ඉදිරිපත් කර සැකකරුට ඇප ලබා දීම සම්බන්ධයෙන් හැටන් ප්‍රදේශයේ අගතියට පත් පාර්ශව කිහිපයක් හැටන් කොට්ඨාශ භාර පොලිස් අධිකාරිවරයාව සිය කාර්යාලය ඉදිරිපිටදී මුණ ගැසී සිද්ධිය සම්බන්ධයෙන් තොරතුරු පැවසීමෙන් පසු අගතියට පත් සියලු පාර්ශවයන්ගේ සියලු පැමිණිලි සටහන් කර ගැනීමට කටයුතු කරන බවත්, එම පැමිණිලි මත යලිත් සැකකරු හැටන් මහේස්ත්‍රාත් අධිකරණ වෙත ඉදිරිපත් කරන බව පවසා ඇත.

සැකකරු පැමිණි මෝටර් රථය මේ වන විට හැටන් පොලිසිය භාරයේ රදවා ගැනිමට පොලිස් අධිකාරිවරයා පියවර ගෙන ඇත.
මිනිස් ජාවාරමට සම්බන්ධයෙන් අත්අඩංගුවට ගත් සැකකරුවෙකුට පක්ෂපාතීව හැටන් කොට්ඨාශ පොලිස් විශේෂ අපරාධ විමර්ෂණ අංශයේ නිළධාරින් කටයුතු කිරිම සම්බන්ධයෙන් විමර්ෂනයක් සිදු කරන ලෙස අගතියට පත් පාර්ෂවය විසින් පොලිස්පතිවරයාගෙන් ඉල්ලා සිටියි.