පළමු වසරට සිසුන් ඇතුළත්වීම සැලකිය යුතු ලෙස අඩුවෙලා

1 වසරට ළමුන් ඇතුලත් කිරීමේදී වසර 05ට පෙර 360,000ක් පැවති සංඛ්‍යා වර්තමානෙය් වන 298,000ක් දක්වා අඩුවෙලා, මේක භයානක අඩුවීමක්  - පා.ම.රවී කරුණානායක

උපත් සංඛ්‍යාව අඩු වීම ඊට ප්‍රධාන වශයෙන් බලපාලා, 2030 වන විට පුරෝකතනය අනුව මෙම සංඛ්‍යාව 196,209ක් විය හැකියි - අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න

වසර 05කට පෙර රජයේ පාසල් වල 01 ශ්‍රේණියට ඇතුලත් කළ ශිෂ්‍ය සංඛ්‍යව 360,000ක් වන අතර, වර්තමානය වන විට එම සංඛ්‍යාව 298,000ක් දක්වා අඩුවී ඇති බවත්, එය භයානක අඩුවීමක් බවත් නව ප්‍රජාතන්ත්‍රවාදී පෙරමුණේ පාර්ලිමේන්තු මන්ත්‍රී රවී කරුණානායක මහතා පැවසීය.

එය නිවැරදි කිරීමට රජය ගනු ලබන පියවර ඊයේ(05දා) පාර්ලිමේන්තුවේදී ප්‍රශ්නයක් යොමු කරමින් හෙතෙම සඳහන් කළේය.

රජයේ පාසල් වල 01 ශ්‍රේණියට ඇතුලත් වන සංඛ්‍යාව ඉදිරි වසර 05ක කාලයට පුරෝකතනය අනුව 2030 වන විට මෙම සංඛ්‍යාව 196,209ක් විය හැකි බවත්, මීට ප්‍රධාන වශයෙන් උපත් සංඛ්‍යාව අඩුවීම බලපා ඇති බවත් ඊට පිළිතුරු ලබා දෙමින් අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා පැවසීය.

අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න - පසුගිය වර්ෂ 05 ඇතුලත රජයේ පාසල් වල 01 ශ්‍රේණියට ඇතුලත් කරන ලද සංඛ්‍යාව 2023දී 298,959යි, 2022දී 303,868යි, 2021දී 315,363යි. 2020දී 330,571යි. මීලග වර්ෂ 5 තුළ රජයේ පාසල් වල 1 ශ්‍රේණියට ඇතුලත් වෙතැයි පුරෝකතනය අනුව 2030 196,209යි, 2029දී 218,347යි, 2028දී 244,545යි, 2027දී 257,443යි, 2026දී 265,738යි.

නව ප්‍රජාතන්ත්‍රවාදී පෙරමුණේ පාර්ලිමේන්තු මන්ත්‍රී රවී කරුණානායක - 360,000ක් අවුරුදු 05කට කලින් තිබුණු එක, අද 298,000ට අඩු වෙලා තිබෙනවා. භයානක අඩුවීමක් තිබෙන්නේ. කොහොමද මේක නිවැරදි කරන්න ගමනක් ආරම්භ කරන්නේ?

අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න - අවුරුදු 05ක විතර පුරෝකතනය ගන්නකොට අපි ගත්ත එකක් තමයි උපත් සංඛ්‍යාව. එහි සංඛ්‍යාත්මක අඩුවීමක් තිබෙනවා. සියලුම දරුවන් වසර 13ක පාසල් අධ්‍යාපනය නිමා කළ යුතුයි කියන තීරණයේ අපි ඉන්නේ.