පංති කාමරයක සිසුන් 25 -30ත් අතරට ගෙන ඒම අරමුණයි
නව අධ්‍යාපන ප්‍රතිසංස්කරණ තුළින් පන්ති කාමරයක සිසුන් ප්‍රමාණය 25ත් 30ත් අතරට ගෙන ඒම අරමුණක් බවත් ගුරුවරුන්ගේ වෘත්තීයභාවය වැඩිකරන්න ඉදිරියේදී කටයුතු කරන බවත් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මිය ප්‍රකාශ කළාය.
පාසල් පන්ති කාමරයක සිසුන් ප්‍රමාණය 25ක් - 30ක් බවට පත්කිරීම අරමුණක් බවත්, පන්ති කාමරයක ළමුන් 50ක් 60ක් සමඟ ගුණාත්මක අධ්‍යාපනයක් ලබා දීමට නොහැකි බවත් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය පැවසුවාය.
නව අධ්‍යාපන ප්‍රතිසංස්කරණය සම්බන්ධයෙන් දකුණු පළාතේ අධ්‍යාපන බලධාරීන් දැනුවත් කිරීම වෙනුවෙන් ගාල්ල දක්ශිණපාය ශ්‍රවණාගාරයේ දී ඊයේ (ජුලි 19 )දින පැවති වැඩසටහනකට එක්වෙමින් අග්‍රාමාත්‍යවරිය මේ බව පවසා සිටියාය.
නව අධ්‍යාපන ප්‍රතිසංස්කරණ සම්බන්ධයෙන් පළාත් බලධාරීන් දැනුවත් කිරීමේ සිව්වන වැඩසටහන අමතමින් අග්‍රාමාත්‍යවරිය මෙසේද කීය.
"රජයේ ප්‍රතිපත්ති අනුව යමින් විශේෂඥයින් සමග සාකච්ඡා කරලා, විවිධ අංශවල අදහස් ලබාගෙන මේ පිළිබඳ ප්‍රතිපත්ති සම්පාදනය කළේ.
නව අධ්‍යාපන ප්‍රතිසංස්කරණය තුළ විෂය මාලාව පමණක් නෙමෙයි, ගුරුවරුන්ගේ වෘත්තීයභාවය වැඩිකරන්න, අධ්‍යාපන පරිපාලන ව්‍යුහය නව ප්‍රතිසංස්කරණයට අදාලව ප්‍රතිසංස්කරණය කරන්න, සියලු දරුවන්ට සමාන හා ගුණාත්මක අධ්‍යාපනයක් ලබා දීම වෙනුවෙන් අවශ්‍ය යටිතල පහසුකම් සංවර්ධනය කරන්න කටයුතු කරනවා.
මේක අපි පෞද්ගලික අවශ්‍යතාවකට කරන දෙයක් නෙමෙයි, රටේ අවශ්‍යතාව අවබෝධකරගෙන අපි ඉටු කළයතු වගකීමක් කියන හැඟීමෙන් කරන වැඩක්.
අවංක චේතනාවෙන් මේ පිලිබඳ අවබෝධයෙන් සමාජය තුළ යම් සංවාදයක් ඇති කරන පිරිසක් වගේම හරි අවබෝධයක් නැතුව විවේචනකරන පිරිසකුත් සිටිනවා. තවත් සමහර අය දේශපාලනිකව වාසි ගන්නත් විවේචනය කරනවා. අපි දන්නවා මේ ප්‍රතිසංස්කරණය සිදු කිරීම අභියෝගයක්, පහසු නැහැ. නමුත් නොකර ඉන්නත් බැහැ. ජනතාව මේ සියල්ල නිවැරදි කරන්න තමයි අපිට මනාපය පළ කළේ.
නව අධ්‍යාපන ප්‍රතිසංස්කරණය වෙනුවෙන් කළ යුතු වැඩ රාශියක් තිබෙනවා. ගුරු විද්‍යාලවල විෂය නිර්දේශ වසර 16කින් වෙනස් වෙලා නැහැ, ඒ සියල්ල වෙනස් වෙන්න ඕන. ගුරුවරුන්ට, අධ්‍යාපනඥයින්ට අඛණ්ඩ පුහුණුවක් ලබා දෙන්න ඕන. අගෝස්තු මාසේ ඉදලා පුහුණුකරුවන් පුහුණු කරමින් ගුරුපුහුණුව ලබා දෙන්න අවශ්‍ය කටයුතු සිදු කරනවා. යැයි අග්‍රාමාත්‍යවරිය මෙහිදී පැවසුවාය,
කමල් ශ්‍රී ලියනගේ
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
