නොවැම්බර් 27 සවස 2.07ට මහනුවරින් නාවලපිටිය බලා ගිය දුම්රිය තවමත් නාවලපිටියට ගියේ නෑ

දිට්වා සුළි කුණාටුව සමග ඇතිවූ අයහපත් කාලගුණය හේතුවෙන් දුමිරය මාර්ග නැයයෑමෙන් ධාවනය වෙමින් තිබූ මගී ප්‍රවාහන දුම්රියක් මාස 02ක් තිස්සේ උලපනේ සහ ගම්පොළ දුම්රිය ස්ථාන 02 අතර ගාල් කර තිබෙන අයුරු අප කැමරාවේ (13) දින මෙසේ සටහන් විය.

නොවැම්බර් 27 වන දා පස්වරු 2.07ට සුපුරුදු පරිදි මහනුවරින් නාවලපිටිය බලා අංක 1153 "පාසල් දුම්රිය" ලෙස ප්‍රචලිත දුම්රිය ගමන් ආරම්භ කළත් එයට ගමනාන්තයේ තෙක් මෙතෙක් ළඟා වීමට නොහැකි වී ඇත.

ගම්පොළ තැඹිලිගල සහ උලපනේ අතර වරකාපිටිය උපදුම්රිය පොළ ආසන්නයේදී දුම්රිය මාර්ගය ස්ථාන දෙකකින් නාය ගොස් තිබුණි.
ගම්පොළ තැඹිලිගල වරකාපිටියේ සිට උලපනේ දුම්රිය ස්ථානය දෙසට ගමන් ගත් දුම්රියෙහි රියදුරු මාර්ගයට වැටී තිබූ පස් කන්දක් නිසා ඉදිරියට ධාවනය කිරීමට නොහැකි බව නාවලපිටිය දුම්රිය පාලක මැදිරියට දැනුම් දි ඇත.

ඉන් අනතුරුව නැවත ගම්පොළ දුම්රිය ස්ථානයේ වෙත දුම්රිය පසුපසට ධාවනය කිරීම සඳහා රියදුරු උත්සහ කල අවස්ථාවේ දුම්රිය ගමන් ගත් මාර්ගයේ ගම්පොළ වරකාපිටිය දුම්රිය උපපොළ ආසන්නයේ දුම්රිය මාර්ගයේ නැයයෑම රියදුරට දර්ශනය වීමෙන් ඔහු විසින් දුම්රිය උලපනේ සහ වරකාපිටිය දුම්රිය උපපොළ අතර ආරක්ෂිත ස්ථානයකට රැගෙන ගොස් නතර කිරිමට රියදුරු සමත් වී ඇත.
මෙසේ දුම්රිය ආරක්ෂිතව නවතා ගැනීමට හැකි වූයේ එහි දුම්රිය රියදුරුගේ ස්ථානෝචිත ප්‍රඥාව නිසාවෙන් බව දුම්රිය නවතා ඇති උලපනේ වරකාපිටිය ගම්වාසීන් කියා සිටියි.

එසේම දුම්රිය මාර්ගයට හානි වීම නිසා එකම පොදු ප්‍රවාහනය ලෙස දුම්රිය භාවිතා කළ තමන් දෛනික ගමනාගමනය වෙනුවෙන් මහත් වෙහෙසක් හා මුදලක් දැරීමට සිදුවන බවත් එනිසා හැකි ඉක්මනින් මෙම දුම්රිය මාර්ගයේ ප්‍රතිසංස්කරණය කරවීම ආරම්භ කරන ලෙස ප්‍රදේශවාසින් ඉල්ලා සිටියි.එම දුම්රියේ ගමන් ගත් දුම්රිය රියදුරන් සහ කාර්ය මණ්ඩලය දින 03කට පසු නාවලපිටිය දුම්රිය ස්ථානය වෙත පැමිණ ඇත.