ඩුබායි යන්න ගිය ශ්‍රී ලංකන් යානය කුරුල්ලෙක් ගැටීමෙන් ආපසු එයි

 ඩුබායි බලා කටුනායක ගුවන් තොටුපළෙන් පිටත්ව ගිය ශ්‍රී ලන්කන් ගුවන් සේවයේ යානයක , ඇංජිමක කුරුලෙකු ගැටීම නිසා ඉතිරි තනි ඇංජිමෙන් පැය දෙකක ගුවන් ගමනකින් පසු , යළිත් ආපසු කටුනායක ගුවන් තොටුපළ වෙත ඊයේ (26) දින රාත්‍රී පැමිණි බව ශ්‍රී ලන්කන් ගුවන් සේවයේ මාධ්‍ය ප්‍රකාශකවරයා සඳහන් කළේය .

 මෙම ශ්‍රී ලන්කන් ගුවන් යානය ප්‍රංශයේ නිෂ්පාදිත , ඒ - 330 වර්ගයේ ඇංජින් දෙකකින් සමන්විත එයා බස් වර්ගයේ ගුවන් යානයකි .

 මෙම ගුවන් යානය තුළ මගීන් 268ක් සහ කාර්යය මණ්ඩලය 12ක් සිටිය බැව් ගුවන් තොටුපළ ආරංචි මාර්ග සඳහන් කළේය .

 ශ්‍රී ලන්කන් ගුවන් සේවයට අයත් යූ.එල්.- 225 දරන මෙම ගුවන් යානය ඊයේ දින රාත්‍රී 6.40 ට කටුනායක ගුවන් තොටුපළෙන් ඩුබායි බලා පිටත්ව ගිය අතර , එය ඉන්දීය ගුවන් සීමාවේ දී , මෙම ගුවන් යානයේ වම් පස අංක 01 දරන ඇංජිම කුරුල්ලෙකු හා ගැටී තිබේ .

ඉන්පසු තවදුරටත් මෙම ගුවන් යානය ඉදිරියට යෑම අත්හිටවූ ගුවන් නියමුවරයා , යානය වහාම ආපසු හරවාගෙන , යළිත් රාත්‍රී 8.11ට කටුනායක ගුවන් තොටුපළ වෙත නිරුපද්‍රිතව ගොඩ බැස්සවීමට සමත් වී තිබේ .

පසුව මෙම මගීන් සියල්ල , ශ්‍රී ලන්කන් ගුවන් සේවයේ වෙනත් ගුවන් යානයක් මගින් , එදිනම රාත්‍රී 11.15 ට පමණ යළිත් ඩුබායි බලා පිටත් කර හැරීමට පියවර ගෙන තිබේ .

මේ වනවිට අනතුරුට පත් මෙම ගුවන් යානය අලුත්වැඩියා කටයුතු සඳහා යොමු කර තිබේ .

කටුනායක - ටි.කේ.පි කපිල