ජනපතිගේ නායකත්වය යටතේ ලංකාව දුෂ්කරතා ජය ගනීවි - චීන ජනපති

බීජිං, ජුලි 22 (ෂිංහුවා) - ශ්‍රී ලංකාවේ නව ජනාධිපතිවරයා ලෙස තේරී පත් වූ රනිල් වික්‍රමසිංහ මහතා වෙත චීන ජනාධිපති ෂී ජින් පිං මහතා සිකුරාදා සුබ පැතුම් පණිවිඩයක් යවා ඇත.

චීනය සහ ශ්‍රී ලංකාව එකිනෙකාගේ සාම්ප්‍රදායික මිත්‍ර අසල්වැසියන් බව ෂී සිය පණිවිඩයෙන් පෙන්වා දී ඇත. වසර 65 කට පෙර රාජ්‍ය තාන්ත්‍රික සබඳතා පිහිටුවීමේ සිට, දෙරට සෑම විටම අන්‍යෝන්‍ය ගෞරවය, සමානාත්මතාවය සහ අන්‍යෝන්‍ය ප්‍රතිලාභ යන පදනම මත ද්විපාර්ශ්වික සබඳතා වර්ධනය කිරීම ප්‍රවර්ධනය කර ඇති අතර විශාල හා කුඩා රටවල් අතර මිත්‍රශීලී අන්තර්ක්‍රියා සහ අන්‍යෝන්‍ය වශයෙන් වාසිදායක සහයෝගීතාවයේ ආදර්ශයක් තබා ඇතැයි ඔහු සිය පණිවිඩයෙන් පැවැසීය.

චීන ජනපතිවරයා සුබ පැතුම් පණිවිඩය ශ්‍රී ලංකාවේ චීන තානාපති චී ශෙන්හොන් මහතා විසින් ජනපතිවරයා වෙත පිළිගැන්වීය.

COVID-19 වසංගතය ආරම්භයේ සිටම, චීනය සහ ශ්‍රී ලංකාව එක්ව සිට එකිනෙකාට උපකාර කරගත් බවත් ඒ අනුව දෙරටේ සාම්ප්‍රදායික මිත්‍රත්වය තවදුරටත් වැඩිදියුණු කර ඇති බව ෂී පැවසීය.

ජනාධිපති වික්‍රමසිංහගේ නායකත්වය යටතේ ශ්‍රී ලංකාව නිසැකවම තාවකාලික දුෂ්කරතා ජයගෙන ආර්ථික හා සමාජීය ප්‍රකෘති ක්‍රියාවලිය ඉදිරියට ගෙන යනු ඇතැයි තමා විශ්වාස කරන බව ෂී අවධාරණය කළේය.

චීන-ශ්‍රී ලංකා සබඳතා වර්ධනයට තමා විශාල වැදගත්කමක් දක්වන බවත්, ජනාධිපති වික්‍රමසිංහ මහතාට සහ ශ්‍රී ලාංකික ජනතාවට තම හැකියාවට ඉඩ ලැබෙන පරිදි සහයෝගය  ලබා දීමට තමන් කැමති බවත් ෂී පැවසීය.

දෙපාර්ශවය තම සාම්ප්‍රදායික මිත්‍රත්වය ඉදිරියට ගෙන යමින් දේශපාලන අන්‍යෝන්‍ය විශ්වාසය තහවුරු කර ගනිමින් අවංක අන්‍යෝන්‍ය සහය සහ කල් පවත්නා මිත්‍රත්වය ඇතුළත් උපායමාර්ගික සහයෝගිතා හවුල්කාරිත්වය අඛණ්ඩව ඉදිරියට ගෙන යනු ඇතැයි තමා බලාපොරොත්තු වන බව චීන ජනාධිපතිවරයා ප්‍රකාශ කළේය.