ජාතික තොරතුරු තාක්ෂණ ශූරයෝ තරගාවලියට අයදුම්පත් කැඳවීම 2020 ජුනි 30 දක්වා දීර්ඝ කෙරේ

අධ්‍යාපන අමාත්‍යාංශයේ තොරතුරු හා සන්නිවේදන තාක්ෂණ ශාඛාව, ශ්‍රී ලංකා තොරතුරු තාක්ෂණ කර්මාන්ත මණ්ඩලය, ශ්‍රී ලංකා පරිගණක සංගමය සහ කොළඹ විශ්වවිද්‍යාල‍යීය පරිගණක අධ්‍යයන අංශය සමඟ එක්ව 12 වැනි වරටත් පවත්වනු ලබන ජාතික තොරතුරු හා සන්නි‍වේදන තාක්ෂණ ශූරයෝ තරගාවලිය සඳහා ලියාපදිංචිවීමට අයදුම්පත් කැඳවීමේ දිනය 2020 ජුනි 30 තෙක් දීර්ඝ කිරීමට තීරණය කර ඇත. ඒ අනුව, මෙම තරගාවලිය සඳහා නිර්මාණ භාරගැනීමේ අවසන් දිනය ජුලි 31 වන තෙක් දීර්ඝ කර ඇත.

මෙම තරගාවලිය ප්‍රධාන අංශ 03කින් ක්‍රියාත්මක කෙරෙන අතර, ජාතික මට්ටමේ පාසල් මෘදුකාංග තරගාවලිය (NSSC) ශ්‍රී ලංකා පරිගණක සංගමය විසින්ද, ගුරුවරුන් සදහා වන ‘නිර්මාණාත්මක ගුරුවරු’  තරගාවලිය අධ්‍යාපන අමාත්‍යාංශය විසින් ද, තරුණ පරිගණක විද්‍යාඥයින්ගේ තරගාවලිය (YCS) ශ්‍රී ලංකා තොරතුරු තාක්ෂණ කර්මාන්ත මණ්ඩලය විසින් ද ක්‍රියාවට නංවයි.

 පාසල් මෘදුකාංග තරගාවලියේ පළමු කාණ්ඩය යටතේ 6-11 ශ්‍රේණි සිසුන්ට ද, දෙවැනි කාණ්ඩය යටතේ 12-13 ශ්‍රේණි සිසුන්ට ද අයදුම් කළ හැකි අතර, මෙය මාර්ගගත ලෙස (ONLINE) පැවැත්වෙන තරගයකි. මෙහි දී  පරිගණක වැඩසටහන් ගොඩනැංවීමට තරගකරුවන්ට සිදුවන අතර, තරග ඇගයීම් කටයුතු ද මාර්ගගත ක්‍රමයට සිදුකෙරේ.

 ගුරුවරුන් සඳහා වන ‘නිර්මාණාත්මක ගුරුවරු’ තරගය සඳහා රජයේ සහ රජයේ අනුමත පෞද්ගලික පාසල්වල ස්ථිර සේවයේ යෙදෙන ගුරුභවතුන්ට මෙන් ම ජාතික අධ්‍යාපන විද්‍යාපීඨවල සිටින ගුරු සිසුන්ට ද අයදුම් කළ හැකිය.