කපුගම ව්‍යාපාරිකයාට වෙඩි තැබීමට සැකකරුවෙක් අල්ලයි

ගන්දර කපුගම ප්‍රදේශයේ නිවසක සිටි ව්‍යාපාරිකයෙකුට වෙඩි තබා තුවාල සිදු කිරිමේ සිද්ධියට පැමිණි සැකකරුවන් දෙදෙනාට නවාතැන් පහසුකම් සැපයීම සම්බන්ධයෙන් පින්තාරුකරුවෙකු ඊයේ (04) සැක පිට ප්‍රශ්න කිරීම සදහා අත්අඩංගුවට ගත් බව ගන්දර පොලීසිය පවසයි.

ඉකුත් 31 වැනි දින හා 01 වැනි දින අදාල වෙඩික්කරු හා යතුරුපැදිකරු එම සැකකරුගේ නිවසේ නවාතැන් ගෙන සිට ඇති බවට පොලීසිය වෙත තොරතුරු ලැබී ඇත.

ඊට අමතරව අපරාධය සදහා යොදා ගත් යතුරු පැදිය ද එම නිවසේ නතර කර තිබී ඇති බවට ද පොලීසිය කරුණු අනාවරණය කර ගෙන තිබේ.

අදාල සැකකරුගෙන් ප්‍රශ්න කිරිමේදී හෙලි වී ඇත්තේ තම බාල සහෝදරයා ඔහුගේ මිතුරන් දෙදෙනෙකු බව පවසා ඔවුන් තම නිවසේ නතර කර ගිය බවයි.

කෙසේ වෙතත් එම බාල සහෝදරයා මේ වන විට ප්‍රදේශය අතහැර පලා ගොස් සැගවී සිටින අතර ඔහු මෙම අපරාධයේ ප්‍රධාන සැකකරුවන් සමග සෘජු සම්බන්ධතා පවත්වන්නට ඇති බවට පොලීසිය සැක කරයි.

ඩුබායි හී සැගවී සිටින පාතාල කල්ලි සාමාජිකයෙකු වු දෙවිනුවර දෙහි බාලේ මල්ලී නැමැත්තාගේ මෙහෙයවීම මත මෙම අපරාධය සිදු කරන්නට ඇති බවට මේ වන විට පොලීසිය විශ්වාස කරයි.

කෙසේ වෙතත් සැකකරුවන්ට පහසුකම් සැලසීම හා ආධාර අනුබල දීම යටතේ සැක පිට අත්අඩංගුවට ගත් කපුගම දෙව්ගම්පුර පදිංචි පින්තාරුකරු මාතර මහේස්ත්‍රාත් අධිකරණය හමුවට ඉදිරිපත් කිරීමට නියමිතය.

දකුණු පලාත භාර ජේෂ්ඨ නියෝජ්‍ය පොලිස්පති කිත්සිරි ජයලත් මහතාගේ උපදෙස් මත මාතර ජේෂ්ඨ පොලිස් අධිකාරී වසන්ත ජයමිණි කුමාර මහතාගේ අධීක්‍ෂණය යටතේ ගන්දර පොලීසියේ ස්ථානාධිපති චාමින්ද ජයලත් මහතා ඇතුළු කණ්ඩායමක් මේ පිළිබඳව වැඩිදුර පරීක්ෂණ මෙහෙයවති.

ක්‍රිෂාන් ජීවක ජයරුක්