එජා මානව හිමිකම් මහ කොමසාරිස්වරයෙක් වසර 9කට පසු ලංකාවට

එක්සත් ජාතීන්ගේ මානව හිමිකම් පිළිබඳ මහ කොමසාරිස් වොල්කර් ටර්ක් මහතා ජුනි 23 සිට 26 දක්වා ශ්‍රී ලංකාවේ නිල සංචාරයක නිරත වීමට නියමිත බව විදේශ කටයුතු අමාත්‍යාංශය පවසයි. මෙය 2016 පෙබරවාරි මාසයෙන් පසු එක්සත් ජාතීන්ගේ මානව හිමිකම් පිළිබඳ මහ කොමසාරිස්වරයෙකු ශ්‍රී ලංකාවේ කරන පළමු සංචාරය වෙයි.

සංචාරය අතරතුර, මහ කොමසාරිස්වරයා ජනාධිපතිවරයා සහ අග්‍රාමාත්‍යවරයා හමුවීමට නියමිතය. ඔහු විදේශ කටයුතු, විදේශ රැකියා සහ සංචාරක අමාත්‍යවරයා, තවත් කැබිනට් අමාත්‍යවරුන් කිහිප දෙනෙකු, පාර්ලිමේන්තු මන්ත්‍රීවරුන්, ජ්‍යෙෂ්ඨ රජයේ නිලධාරීන්, ආගමික නායකයින්, සිවිල් සමාජයේ නියෝජිතයින්, රාජ්‍ය තාන්ත්‍රික ප්‍රජාවේ සාමාජිකයින් සහ ශ්‍රී ලංකාවේ මානව හිමිකම් කොමිසම සමඟ ද රැස්වීම් පවත්වනු ඇත.

මෙම සංචාරය අතරතුළදී මහ කොමසාරිස්වරයා මහනුවරට ගොස් දළදා මාලිගාවට වැඳ පුදා ගැනීමට නියමිත අතර එයට සමගාමීව මල්වතු සහ අස්ගිරි පාර්ශවයන්හි මහනාහිමිවරුන් හමුවනු ඇත. ඔහු යාපනය සහ ත්‍රිකුණාමලය වෙත ද සංචාරය කරන අතර එහිදී ඔහු උතුරු සහ නැගෙනහිර පළාත්වල ආණ්ඩුකාරවරුන් හමුවනු ඇත.

මානව හිමිකම් පිළිබඳ මහ කොමසාරිස් කාර්යාලය සමඟ ශ්‍රී ලංකා රජය අඛණ්ඩව කරගෙන යන ඵලදායී සම්බන්ධතාවයට අනුකූලව, මානව හිමිකම් සහ සංහිඳියාව ප්‍රවර්ධනය කිරීම සහ ආරක්ෂා කිරීම තවදුරටත් ඉදිරියට ගෙන යාම කෙරෙහි මෙම සංචාරය අතරතුරදී සැලකිය යුතු සාකච්ඡා අවධානය යොමු කරනු ඇත.