උණවටුනට එන බස්වලින් අධික ශබ්ද‍යෙන් සංගීතවාදන පැවැත්වීම තහනම්

පාසල් සිසුන් ඇතුළු, චාරිකා සඳහා පැමිණෙන පුද්ගලයන් රැගත් බස් රථ උණවටුන වෙරළ ආසන්න ප්‍රදේශයේ නවත්වාගෙන අධික ශබ්දයෙන් සංගීත වාදන පැවැත්වීම නතර කරන ලෙස ගාල්ල දිස්ත්‍රික් ලේකම් හබරාදුව පොලිස් ස්ථානයට පසුගිය  දා දැනුම් දුන්නේ ය.

දිස්ත්‍රික් ලේකම් කාර්යාලයේ දී පසුගිය 31 වැනි දා පැවැති දිස්ත්‍රික් පරිසර කමිටු රැස්වීමේ දී මෙම කරුණ සාකච්ඡාවට ලක් වූ අතර එහි දී දිස්ත්‍රික් ලේකම් ඩබ්ලිව්.ඒ.ධර්මසිරි මහතා කියා සිටියේ මෙම ගෝෂාකාරී ශබ්දය පිළිබඳ දිගින් දිගටම පැමිණිලි ලැබෙන බවයි.

ශබ්ද විකාශන භාවිතා කිරීමේ දී රටේ නීතියක් තිබෙන බවත්, විනෝද චාරිකා පැමිණෙන බස්රථවල ශබ්ද විකාශන උපකරණ සවිකරගෙන ඒවා ඝෝෂාකාරී ලෙස ක්‍රියාත්මක කිරීම පදිංචිකරුවන්ට බලවත් පීඩාවක් බව ද දිසාපතිවරයා පෙන්වා දුන්නේය.

ඇතැම් බස් රථ මධ්‍යම රාත්‍රිය වනතුරුම එලෙස ඝෝෂාකාරී ශබ්ද විසුරුවාහරින බව ද දිස්ත්‍රික් සම්බන්ධීකරණ කමිටුවේ දී අනාවරණය විය.

මෙය නවතා දැමීමට කටයුතු කරන බව හබරාදුව පොලිසිය දිස්ත්‍රික් පරිසර කමිටුවේ දී එකඟ විය.

සිරංගිකා ලොකුකරවිට