ඉන්ධන අර්බුදයෙන් හෝටල් ක්ෂේත්‍රය කඩා වැටිලා
ඉන්ධන අර්බුදය හේතුවෙන් උත්සව ශාලා සහ ආහාර සැපයුමේ ක්ෂේත්‍රය කඩා වැටීමට ලක්ව ඇති බැවින් මෙම ක්ෂේත්‍රයේ නිරත ලක්ෂ පහක පමණ පිරිසකට රැකියාවන් පවා අහිමි වන තත්ත්වයක් උදාවී ඇති බව සමස්ත ලංකා උත්සව ශාලා සහ ආහාර සැපයුම් කරුවන්ගේ සංගමයේ උප සභාපති සාලිය රවීන්ද්‍ර මහතා සදහන් කරයි.
මාධ්‍ය හමුවක් පවත්වමින් හෙතෙම සඳහන් කර සිටියේ, උත්සව ශාලා පවත්වාගෙන යාමේදී වැඩි වශයෙන් විදුලි ජනන යන්ත්‍ර භාවිතා කරන බැවින් සහ ආහාර පාන ප්‍රවාහනය පිනිස අවශ්‍ය පරිදි ඉන්ධන නොමැතිවීම මත කළුකඩ මගින් ඉන්ධන ලබා ගැනීමේ තත්ත්වයකට රජය තල්ලු කොට ඇති බවය.
මෙම කර්මාන්තය පවත්වාගෙන යාම සදහා ඉන්ධන ලබාගැනීම පිනිස සහන සැලසීමක් සිදු කරන ලෙස ඉල්ලා සිටියද මෙතෙක් නිසි විසදුමක් නොලැබුන බවත් පවතින තත්ත්වය මගහරවා ගැනීම පිනිස ඒ ඒ දිස්ත්‍රික්කයන්හි ලංගම ඩිපෝ මගින් හෝ උත්සවශාලා සහ ආහාර සැපයුම් කරුවන් වෙත ඉන්ධන ලබා ගැනීමේ ක්‍රමවේදයක් සකස් කර දෙන ලෙසට රජයෙන් ඉල්ලා සිටින බවත් සාලිය රවීන්ද්‍ර මහතා මෙහිදී වැඩිදුරටත් සඳහන් කළේය.
මෙහිදී සංගමයේ භාණ්ඩාගාරික ජනක සිරිවර්ධන මහතා අදහස් දක්වමින්, විදේශ රටවල රජයන් මගින් කර්මාන්තකරුවන්ට සහන සලසන මුත් මෙරට එවන් තත්ත්වයක් නොමැති බව සදහන් කළ අතර කර්මාන්ත පවත්වාගෙන යාම පිනිස යටිතල පහසුකම් ලබා දෙන ලෙස රජයෙන් ඉල්ලා සිටින බව පැවසීය.
මෙහිදී මානෙල් උක්වත්ත මහත්මියද අදහස් දැක්වූ අතර සංගමයේ නිලධාරීන් පිරිසක්ද මීට එක්ව සිටියහ.
ගම්පහ තිලකරත්න දිසානායක
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
