ඇමෙරිකාව සමග ඇතිකරගත් එකඟතා රටට හෙළි කරන්න

ඇමරිකාව සමග ඇති කරගත් එකඟතාව කුමක්ද යන්න වහාම රටට හෙළි කරන ලෙස ශ්‍රී ලංකා පොදුජන පෙරමුණ ආණ්ඩුවට අවධාරණය කර සිටී.

එහි මාධ්‍ය ප්‍රකාශක සංජීව එදිරිමාන්න මහතා පෙන්වා දුන්නේ ඇමරිකාව බදු පනවා පසුව අඩුකිරීමට හේතුව ඇමරිකානු අභිලාෂයන්ට එකඟතාව පළකර තිබෙන පදනම මත වන බවත් එසේම එය ධවල මන්දිර ප්‍රකාශනයෙන් පෙන්නුම් කරන බවත්ය.

ඒ අනුව ශ්‍රී ලංකා පොදුජන පෙරමුණ පක්ෂ මූලස්ථානයේ දි අද (06දා) පැවති මාධ්‍ය හමුවකට එක්වෙමින් ඔහු මෙසේද පැවසීය.

“ ලෝකයේ හැම රටක්ම ඇමරිකාව විසින් තමන් වෙත පනවපු මේ අන්‍යෝන්‍ය තීරු බද්ද පහත දමාගැනීම වෙනුවෙන් ඇතිකර ගත් එකඟතා සහ සාකච්ඡාවේ අන්තර්ගතය විවෘතව තමන්ගේ රට ඇතුළේ කතා කරමින් සිටිනවා. ලංකාවේ මේ තීරු බද්ද සියයට හතළිස් ගණන සියයට තිස් ගණනට ඇවිත් එතනින් සියයට විස්ස දක්වා අඩුවීමට අදාළ එකඟතාව සහ සාකච්ඡාව කුමක්ද කියලා තවම ප්‍රකාශ කර නැහැ. මේ ආණ්ඩුව පිළිබඳව  සැක සිතෙන්න සාධාරණ හේතු අපිට තිබෙනවා.

අනුර කුමාර දිසානායක ජනාධිපතිතුමා නිල සංචාරයකට චීනයට ගිය අවස්ථාවේ ගිවිසුම් 17 කට අත්සන් කළා, නමුත් මේ ගිවිසුම් 17 කුමක්ද යන්නද, එහි අන්තර්ගතය කුමක්ද යන කිසිදු තොරතුරක් රටට කියලා නැහැ. ඉන්දියාවට ගොස් ගිවිසුම් 7 කට අත්සන් තැබුවා. නමුත් ඒ ගිවිසුම් 07 කුමක්ද කියලා ප්‍රකාශ කළේ නැහැ. ඇමරිකා එක්සත් ජනපදය සමඟ ඇතිකරගත්ත යම් එකඟතාවක් තිබෙනවා නම් එය හෙළි නොකිරීම සම්බන්ධව සාධාරණ සැකයක් තිබෙනවා. ධවල මන්දිරය විසින් මීට අදාළ නිවේදනයක් ලෝකයේ මේ සියලු රටවල්වලට අදාළව නිකුත් කර තිබෙනවා. අන්‍යෝන්‍ය තීරු බදු තවදුරටත් සංශෝධනය කිරීම ශීර්ෂය යටතේ.

ධවල මන්දිරය විසින් නිකුත් කළ මේ විශේෂ ප්‍රවෘත්ති නිවේදනයේ කියනවා ඔවුන් මේ බද්ද පනවලා පසුව අඩු කළේ සෑම රටක්ම ඇමරිකා එක්සත් ජනපදය සමඟ ආර්ථික සහ ආරක්ෂක කරුණු සම්බන්ධයෙන් ඉතාම සහයෝගයෙන් ඇමරිකානු අභිලාෂ සමඟ වැඩකරන්න එකඟතාව පළකර තිබෙනවා. නැතිනම් එකඟතාව පළ කිරීමට ආසන්න තැනට ඇවිත් තිබෙනවා කියන පදනම මත තමයි මෙය අඩු කළේ කියලා.

මේ ආණ්ඩුවට යුතුකමක් නැද්ද ලංකාව ඇමරිකාවත් සමග කිසියම් ආකාරයක ආර්ථික වශයෙන් එකඟතාවක් පැමිණියාද? ආරක්ෂාවට අදාළව කිසියම් එකඟතාවක් ඇතිකරගත්ත ද? නැතිනම් මේ නිවේදනයට අනුව එවැන්නක් ඇතිකර ගැනීමට ආසන්නයිද? කියලා ප්‍රකාශ කරන්න. ඒ නිසා ඇමරිකාවත් සමඟ ඇතිකරගත්ත එකඟතාව කුමක්ද කියලා අපි ඔබෙන් ප්‍රශ්න කරනවා මේ ධවල මන්දිර වාර්තාව පදනම් කරගෙන.”