ආහාර බෙදාහැරීම් සහ ප්‍රවාහන අංශයේ ඉන්ධන අවශ්‍යතා පිළිබඳ දත්ත රැස්කරයි

ගෝලීය යුදමය වාතාවරණය හමුවේ මෙරට ආහාර බෙදාහැරීමේ ප්‍රවාහන සේවාවන් සඳහා ඉන්ධන අවශ්‍යතා හඳුනා ගැනීමට විශේෂ දත්ත රැස්කිරීමේ වැඩසටහනක් රජය ආරම්භ කර තිබේ.

වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යාංශය නිවේදනයක් නිකුත් කරමින් මේ පිළිබඳව සඳහන් කර ඇත.

ආහාර බෙදාහැරීමේ ක්‍රියාවලිය වඩාත් කාර්යක්ෂම කිරීමටත්, ඉන්ධන බෙදාහැරීමට අදාළ ප්‍රතිපත්තිමය තීරණ ගැනීමේදී වඩාත් නිවැරදි දත්ත භාවිත කිරීමටත් මෙමගින් අපේක්ෂා කෙරේ.

මෙම වැඩසටහන මගින් විශේෂයෙන් ඉලක්ක කරනු ලබන්නේ ප්‍රවාහන හෝ සැපයුම් මෙහෙයුම්වලට අදාළව වෙනත් කිසිදු අමාත්‍යාංශයක හෝ රජයේ නිල ලේඛනයක මේ දක්වා ලියාපදිංචි වී නොමැති ප්‍රවාහන සේවා සපයන්නන් පමණි.

සමස්ත ක්ෂේත්‍රයේ පවතින ඉන්ධන ඉල්ලුම තක්සේරු කිරීමත් ප්‍රවාහන සේවා සපයන්නන් මුහුණ දෙන මෙහෙයුම් ගැටලු හඳුනා ගැනීමත් නිවැරදි දත්ත මත පදනම් වූ නිර්දේශ ඉදිරිපත් කිරීම සඳහා සහාය වීමත් මෙම දත්ත රැස්කිරීමේ ප්‍රධාන අරමුණු වේ.

මෙම දත්ත රැස්කිරීම ස්වේච්ඡාවෙන් ඉදිරිපත් කරන තොරතුරු මත පදනම් වන අතර, මේ හරහා රැස් කෙරෙන තොරතුරු විධිමත් විශ්ලේෂණයකින් පසුව විදුලිබල හා බලශක්ති අමාත්‍යාංශය සහ ලංකා ඛනිජ තෙල් නීතිගත සංස්ථාව (CPC) වෙත නිර්දේශ ලෙස ඉදිරිපත් කිරීමට නියමිතය.

දැනටමත් එවැනි රජයේ පද්ධතියක ලියාපදිංචි වී ඇත්නම්, තම දත්ත ඉදිරිපත් කිරීම සඳහා අදාළ නිල සන්නිවේදන මාර්ග අනුගමනය කරන ලෙස වෙළෙඳ වාණිජ,ආහාර සුරක්ෂිතතා සහ සමූපකාර සංවර්ධන අමාත්‍යංශය එම සේවා සපයන්නන්ගෙන් ඉල්ලා සිටී.

අදාළ දත්ත ඉදිරිපත් කිරීම සඳහා https://forms.gle/EPPu4bciG6onEptT9 සබැඳිය (Link) ඔස්සේ ගූගල් ආකෘති පත්‍රය (Google Form) වෙත පිවිසිය හැකිය. ඊට අදාළ QR කේතය හරහා ද ගූගල් ආකෘති පත්‍රය (Google Form) වෙත පිවිසිය හැකිය.

මෙම ආකෘති පත්‍රය පිරවීමෙන් පමණක් ඉන්ධන කෝටාවක් හෝ හිමිකමක් ලබා දීම සහතික නොකරන බව ද වෙළෙඳ වාණිජ,ආහාර සුරක්ෂිතතා සහ සමූපකාර සංවර්ධන අමාත්‍යංශය දන්වා සිටී.