ආණ්ඩුවේ සිටින හැමෝටම ඇමතිධුර ලැබෙන්නේ නෑ

පාර්ලිමේන්තුවේ ආණ්ඩු පක්ෂයේ සිටින සියලු මන්ත්‍රීවරුන්ට ඇමතිධුර හිමිවිය යුතු බවත් එසේ නොවන්නේ නම් ජනාධිපතිවරයාට සහය නොදීසිටීමට කවුරුන් හෝ උත්සාහ කරන්නේ නම් එය අනුමත කළ නොහැකි බවත් පසුගිය කාලයේ ඒ ආකාරයට සිතූ අය සතුටු කිරීම සඳහා එකම අමාත්‍යාංශය කෑලි කඩා ඇමතිවරුන් දෙතුන් දෙනා පත් කර තිබූ බව රාජ්‍ය අමාත්‍ය දිලුම් අමුණුගම මහතා පවසයි .

එකම කාර්යය සිදු කරණ අමාත්‍යාංශ කිහිපයක් වෙනුවට ඒ සියල්ල ඒකාබද්ධ කර තනි අමාත්‍යාංශයක් ගොඩනැඟීමට වත්මන් ජනාධිපති වරයා කටයුතු කරමින් සිටින බවත් රටේ අනාගතය ගැන සිතා හෝ ඒ සඳහා සියලු දෙනාගේ සහය ජනාධිපතිවරයාට ලබා දිය යුතුව තිබෙන බවද ආයෝජන ප්‍රවර්ධන රාජ්‍ය අමාත්‍ය දිලුම් අමුණුගම මහතා වැඩිදුරටත් පවසයි .

ඊයේ (24) මහනුවර දී පැවති මාධ්‍ය හමුවකදී ඒ මහතා වැඩිදුරටත් අවධාරණය කර සිටියේ හැකි තරම් ඇමතිධුර ලබා දී සියලු දෙනා සතුටු කිරීමේ ක්‍රමවේදයට තිත තබමින් ජනාධිපතිවරයා ගෙන යන මෙම වැඩපිළිවෙල පැසසිය යුත්තක් බවයි .

කර්මාන්ත අමාත්‍යාංශය සඳහා එක් ඇමතිවරයෙකු සිටියදී ආයෝජන ප්‍රවර්ධන ක්ෂේත්‍රය වෙනුවෙන් තවත් ඇමතිවරයෙකු පත්කොට තිබෙන බවත් ඒ පිළිබඳව ද අවධානය යොමුකොට එකම විෂය පථය ඇති අමාත්‍යාංශ එක් කොට එක් අමාත්‍ය අමාත්‍යවරයෙකු යටතට පත් කිරීමට ජනාධිපතිවරයා ගේ අවධානය යොමු විය යුතුව තිබෙන බවද පැවසීය .

සෞඛ්‍ය අමාත්‍යාංශය තුළ පසුගිය කාලයේ පැනනැගුනු ගැටළු හා අර්බුද හේතුවෙන් වෛද්‍යවරයෙකු අදාල ඇමති ධූරය දැරීමට සුදුසු බවට ජනාධිපතිවරයා තීරණය කර තිබෙන බවත් එම තීරණය සමග තමන් ද එකඟ වන බව කී ඇමැතිවරයා මෙවර ඇමති සංශෝධනයේදී ඇමති ධූර දරන පුද්ගලයන් වෙනස් වුවත් ඇමතිධූර වැඩි වීමක් සිදු වී නොමැති බව ද පැවසීය .

ජාත්‍යන්තර මූල්‍ය අරමුදල පවසන ආකාරයට විදුලි බිල වැඩි කිරීමෙන් නව ආයෝජකයන් ගෙනඒම කෙසේ වෙතත් සිටින ආයෝජකයින් රඳවා ගැනීමත් ගැටලුවක් වී ඇතැයිද ඇමැතිවරයා වැඩිදුරටත් පැවසීය .