අවුරුදු සමයේ සමාජ මාධ්‍ය හරහා සිදුවන වංචා ඉහළට

සිංහල සහ දමිළ අලුත් අවුරුදු සමය සමග සමාජ මාධ්‍ය වේදිකා හරහා සිදුවන මාර්ගගත වංචා සහ මුදල් වංචා ඉහළ යා හැකි බැවින්, ඒ පිළිබදව අවධානයෙන් සහ සුපරීක්ෂාකාරීව කටයුතු කරන ලෙස ශ්‍රී ලංකා පරිගණක හදිසි ප්‍රතිචාර සංසදය (Sri Lanka CERT) මහජනතාවගෙන් ඉල්ලා සිටී.

මෙම වංචනිකයන් ව්‍යාජ දීමනා, විශේෂ වට්ටම්, මුදල් ත්‍යාග සහ තෑගි ලබා දෙන බවට පොරොන්දු වෙමින් ආකර්ෂණීය පණිවිඩ කෙටි පණිවිඩ (SMS) සහ සමාජ මාධ්‍ය වේදිකා හරහා ප්‍රචාරය කරති. ඒ සමඟම, ඔවුන් වංචනික සබැඳි (links) බෙදා හරිමින්, එම සබැඳි හරහා මුදල් ගෙවීමට හෝ පුද්ගලික තොරතුරු ලබා දීමට මහජනතාව පොළඹ වන ආකාරය නිරීක්ෂණය වී ඇත. මෙවැනි වංචනික ක්‍රියාමාර්ග හේතුවෙන් බොහෝ පුද්ගලයින්ගේ බැංකු ගිණුම්වලින් සෘජුවම මුදල් අහිමි වූ අවස්ථා වාර්තා වී ඇත. එමෙන්ම සමාජ මාධ්‍ය වේදිකා භාවිතා කර සිදු කරන අවුරුදු කුමාරි තරග වැනි ක්‍රම යොදාගනිමින් ඡායාරූප ලබා ගෙන ඒවා අවභාවිතා කිරීමේ උත්සහායන් ද  ක්‍රියාත්මකය.

• සැක සහිත සබැඳි මත ක්ලික් නොකිරීම.

• පුද්ගලික තොරතුරු (ජාතික හැඳුනුම්පත් අංක, බැංකු විස්තර ආදිය) ඡායාරූප බෙදා නොගැනීම.

• එක් වරක් භාවිතා කළ හැකි මුරපද (OTP) කිසි විටෙකත් අනාවරණය නොකිරීම. 

මෙම උත්සව කාලසීමාව තුළ ඔබට ලැබෙන ඕනෑම සමාජ මාධ්‍ය පණිවිඩ, කෙටි පණිවිඩ, මුදල් ඉල්ලීමක හෝ දීමනා පිළිබඳ තොරතුරක සත්‍යතාව විශ්වාසනීය මාර්ග හරහා තහවුරු කරගන්නා ලෙස ශ්‍රී ලංකා සර්ට් ආයතනය මහජනතාවගෙන් ඉල්ලා සිටී.