පෞද්ගලික අංශයටත් වැටුප් වැඩිවන ලකුණු

පෞද්ගලික අංශයේ සේවක වැටුප් වැඩි කිරීම සඳහා පඩි පාලක සභා සමග සාකච්ඡා කළ බවත්, ඒ අනුව ඉදිරියේදී පෞද්ගලික අංශයේ පඩි වැඩිවනු ඇති බවත් අග්‍රාමාත්‍ය රනිල් වික්‍රමසිංහ මහතා ඊයේ (07දා) පාර්ලිමේන්තුවේදී පැවසීය. 

එසේම පඩි පාලක සභාවලට අයත් නොවන පෞද්ගලික අංශයේ සේවක වැටුප් වැඩි කිරීම සම්බන්ධවද කටයුතු කරන බව ඒ මහතා සඳහන් කළේය. 
රජ්‍ය දින 100 වැඩපිළිවෙළෙහි ප්‍රගතිය පිළිබඳව පාර්ලිමේන්තුවට කරුණු දැක්වීම සඳහා විශේෂ ප්‍රකාශයක් කරමින් අගමැතිවරයා මේ බව පැවසීය. 

පෙර කිසිදු රජයක් සිදුනොකළ ආකාරයට ගෙවුණු දින 88 තුළ වත්මන් රජය ජනතාවට සහන රැසක් ලබාදුන් බවද හෙතෙම පැවසීය. අත්‍යවශ්‍ය භාණ්ඩවල මිල අඩු කිරීම, ඉන්ධන මිල අඩු කිරීම, ජාතික ඖෂධ පනත සම්මත කිරීම ඒ සඳහා උදාහරණ ලෙස ඔහු දක්වා සිටියේය.