ශ්‍රී ලංකාව නව දිශානතියකට යොමුව තිබෙනවා - ජෝන් කෙරී
ශ්‍රී ලංකාවටත්, ශ්‍රී ලංකාවේ සියලු මිතුරන්ටත් මේ මොහොතේ ගතවෙමින් තිබෙන්නේ 'දීප්තිමත් මොහොතක්' බව ඇමෙරිකා එක්සත් ජනපද රාජ්‍ය ලේකම් ජෝන් මහතා කෙරී පවසයි.
ඇමෙරිකානු රාජ්‍ය ලේකම්වරයා ඒ බව කියා සිටියේ ශ්‍රී ලංකා විදේශ අමාත්‍ය මංගල සමරවීර මහතා සමග සාකච්ඡා පැවැත්වීමට ප්‍රථම වොෂින්ටන් නුවර රාජ්‍ය දෙපාර්තමේන්තුවේදී මාධ්‍යවේදීන් හමුවේ අදහස් දක්වමිනි.
ජනවාරි 08 වැනි දින පැවැත්වුණ ජනපතිවරණයේදී ශ්‍රී ලංකාවේ ඡන්දදායකයන් වෙනසක් උදෙසා සිය ඡන්දය භාවිත කොට තිබෙන බව සඳහන් කළ රාජ්‍ය ලේකම්වරයා, එය විග්‍රහ කළේ ශ්‍රී ලංකාව නව දිශානතියකට යොමු කිරීම උදෙසා ලබා දී තිබෙන වරමක් ලෙසිනි.
නව ආණ්ඩුවේ දින සියයේ වැඩසටහන පිළිබඳව තමන් ඉතා උනන්දුවෙන් බලා සිටින බව පැවසූ රාජ්‍ය ලේකම් ජෝන් කෙරී, එම වැඩසටහන ඇතුළු නව ආණ්ඩුවේ ඉදිරි වැඩපිළිවෙල සාර්ථක වනු ඇති බවට තමන් සුභ පතන බවද පැවසීය.
තරමක් දුරට බිඳ වැටී තිබුණු ද්විපාර්ශ්වික සම්බන්ධතා තරකිරීම උදෙසා කටයුතු කිරීම සිය වගකීමය යන්න තම විශ්වාසය බව මෙහිදී විදේශ අමාත්‍ය මංගල සමරවීර මහතා මාධ්‍යවේදීන් අමතමින් කියා සිටියේය.
ශ්‍රී ලංකාවේ නව ආණ්ඩුවට ඇමෙරිකා එක්සත් ජනපදය අවස්ථා විවර කරන මිතුරෙකු විනා 'තර්ජනයක් නොවන' බවද විදේශ අමාත්‍යවරයා සඳහන් කළේය.
නව ආණ්ඩුව බලයට පත්වී පළමු වැනි සති කිහිපය ඇතුලත ඇමෙරිකානු සහකාර රාජ්‍ය ලේකම් නිෂා බිස්වාල් ශ්‍රී ලංකාවේ සංචාරයක නිරත වූ අතර, ශ්‍රී ලංකාවේ සංචාරයක නිරත වන මෙන් විදේශ අමාත්‍ය මංගල සමරවීර රාජ්‍ය ලේකම් ජෝන් කෙරීට ආරාධනා කරනු ඇති බවද අපේක්ෂිතය.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
