විමල්ගේ ඥාතීන්ට අඩු තක්සේරුවට නිවාස දීලා

පසුගිය රජය යටතේ ඉදිකිරීම්, ඉංජිනේරු සේවා, නිවාස හා පොදු පහසුකම් අමාත්‍ය ධුරය දැරූ විමල් වීරවංශ මහතාගේ ඥාතීන් පිරිසකට මත්තේගොඩ සහ කහතුඩුව ප්‍ර‘දේශවල ඉදිකළ සුඛෝපභෝගී නිවාස ව්‍යාපෘතිවලින් රුපියල් මිලියන 71 ක් වටිනා නිවාස 06 ක් අඩු වටිනාකම් තක්සේරුවකට ලබාදීම පිළිබඳ කරුණු අනාවරණය කරගෙන ඇතැයි නිවාස හා සමෘද්ධි අමාත්‍යාංශ යටතේ පවතින සීමාසහිත ඕෂන් වීව් ඩිවලොප්මන්ට් සමාගමේ සභාපති පූර්ණ චන්දන සිල්වා මහතා පැවසීය.

එසේම එම අමාත්‍යාංශයට අයත් රුපියල් මිලියන 14 ක මහජන මුදල් අවභාවිතාවේ යොදවමින් 2015 වසර සඳහා දින පොත් 30,000 ක් සහ දින දර්ශන තොගයක් මුද්‍රණය කිරීමට පෞද්ගලික සමාගමකට ලබාදීම පිළිබඳව තොරතුරු අනාවරණය වී ඇතැයිද සභාපතිවරයා පවසා සිටියේය.
හෙතෙම මේ බව පැවසුවේ, නිවාස සහ සමෘද්ධි අමාත්‍යාංශයේ ඊයේ (13දා) පැවති ප්‍රවෘත්ති සාකච්ඡාවකදීය. 

විශ්‍රාමික දිසා විනිසුරු ජී.එච්. පුංචිහේවා මහතාගේ ප්‍රධානත්වයෙන් පත්කළ විශේෂ කමිටුවක් මගින් අනාවරණය කරගත් මෙම කරුණු පිළිබඳව පොලිස් මූල්‍ය අපරාධ කොට්ඨාසය වෙත දැනුම්දීමෙන් පසු මේ වනවිට කඩිනම් පරීක්ෂණ අරඹා තිබෙන බවත්, කොළඹ මහේස්ත්‍රාත් අධිකරණය වෙත වාර්තාවක් ඉදිරිපත් කළ බවත් ඒ මහතා ප්‍රකාශ කළේය. 

තම සමාගම වාණිජ අලෙවිය සඳහා මත්තේගොඩ ප්‍රදේශයේ ඉදිකළ නිවාස ව්‍යාපෘතියෙන් වාරිකයක් පමණක් ගෙවීමෙන් පසු විමල් වීරවංශ මහතාගේ වැඩිමහල් සහෝදරියන් දෙදෙනාගේ ස්වාමි පුරුෂයන් වන ඩබ්. හේමසිරි හා ආනන්ද ප්‍රියදර්ශන යන අයට නිවාස 2 ක් ලබාදී තිබූ බවද සභාපතිවරයා පැවසීය. මෙම එක් නිවසක් රුපියල් මිලියන 14 ක් පමණ වටිනා බවද ඔහු කීය. 

එසේම කහතුඩුව ප්‍ර‘දේශයේ ඉදිකළ නිවාස ව්‍යාපෘතියේ තිබූ එකක් මිලියන 10 ක් වටිනා නිවාස 4 ක් හිටපු අමාත්‍යවරයාගේ ඥාතීන්ට බෙදා දී තිබෙන බවද හෙතෙම සඳහන් කළේය.

විමල් වීරවංශ මහතාගේ මස්සිනා කෙනෙකු වන අජිත් කුමාරගේ නමැත්තාටද, වීරවංශ මහතාගේ සහෝදරියගේ පුත්‍රයාගේ භාර්යාව වන වත්සලා කුමාරසිංහටද, වීරවංශ මහතාගේ වැඩිමහල් සහෝදරියගේ පුත්‍රයාගේ භාර්යාව වන ඉසුරු තරංගමාලාට සහ ජනාධිපති මාධ්‍ය ඒකකයේ සිටි මිලින්ද රත්නායකට මෙම නිවාස ලබාදී තිබෙන බව සභාපතිවරයා ප්‍රකාශ කළේය.