විජයගේ අවමගුලට මහින්ද ආවලු

විජය කුමාරතුංග මහතාගේ අවමංගල්‍ය උත්සවයට මහින්ද රාජපක්ෂ මහතා සහභාගි වූ බව එම උත්සවයේ මෙහෙයුම් කමිටුව භාරව කටයුතු කළ ශ්‍රී ලංකා මහජන පක්ෂයේ ආරම්භක දේශපාලන මණ්ඩල සභික ප්‍රේමසිරි පෙරේරා මහතා පැවසීය.

මහින්ද රාජපක්ෂ මහතා එම අවස්ථාවට සහභාගි නොවුණු බවට හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මිය අසත්‍ය ප්‍රකාශයක් සිදුකර ඇතැයිද ඒ මහතා කියා සිටියේය.

කොළඹ පැවැති මාධ්‍ය හමුවකට එක්වෙමින් වැඩිදුරටත් අදහස් දක්වමින් ඒ මහතා කියා සිටියේ විජය කුමාරතුංග මහතා සහ මහින්ද රාජපක්ෂ මහතා අතර ඉතා කිට්ටු සබඳතාවක් පැවැති අතර, ඔවුන් දෙදෙනා විරසකව සිටි බවට හිටපු ජනාධිපතිනිය අසත්‍ය කරුණු ප්‍රකාශ කර තිබෙන බවයි.

විජය සැමරුමකට පසුගියදා කොළඹදී එක්වෙමින් හිටපු ජනපතිනී චන්ද්‍රිකා බණ්ඩාරනායක කුමාරතුංග මහත්මිය පැවැසුවේ 'විජයගේ මළ ගෙදරට නොආ අයත් විජය සමරනවා' යනුවෙනි.