විකිරණ විද්‍යා තාක්ෂණවේදීන් වර්ජනයකට

විකිරණ විද්‍යා තාක්ෂණවේදීන්ට ඇතිවී තිබෙන ගැටලුවලට හා සේවාවට ඇතිවී තිබෙන ගැටලුවලට විසඳුම් ලබා නොදීමට එරෙහිව හෙට (07දා) උදෑසන 8.00 සිට පැය 24 එක්දින වර්ජනයක් සිදුකරන බව රජයේ විකිරණ විද්‍යා තාක්ෂණවේදීන්ගේ සංගමය අවධාරණය කරයි.

වැඩවර්ජනයක් සිදුකළද මානුෂීය හේතූන් මත පිළිකා රෝගීන්ට ප්‍රතිකාර කටයුතු සිදුකරන බවද එම සංගමයේ ප්‍රධාන ලේකම් ධර්මකීර්ති ඈපා මහතා සඳහන් කළේය.

මෙම ක්‍රියාමාර්ගයටත් නිසිලෙස විසඳුම් නොලැබුණහොත් ඉදිරියේදී අඛණ්ඩ වැඩවර්ජනයක් සිදුකරන බවද ඔහු පවසා සිටියේය.

රජයේ විකිරණ තාක්ෂණවේදී සේවාව තුළ 1200කට ආසන්න පිරිසක් සේවය කළ යුතු බවත්, එහෙත් මේ වනවිට සේවය කරන්නේ නිලධාරීන් 550ක් වැනි ප්‍රමාණයක් බවත් හෙතෙම පෙන්වා දුන්නේය.

මෙම පුරප්පාඩු සම්පූර්ණ කිරීමට කිසිදු වැඩපිළිවෙළක් මෙතෙක් සකස් කර නොමැති බවත්, මේනිසා සේවාව පවත්වාගෙන යෑමේදී බරපතළ ගැටලු ප්‍රමාණයක් ඇතිවී තිබෙන බවද ඒ මහතා පවසා සිටියේය.

මීට අමතරව ස්ථාන මාරු ක්‍රමවේදයේ හා අමතර දීමනා ගෙවීමේදීත් ගැටලු ගණනාවක් නිර්මාණයවී තිබෙන බවත්, එම ගැටලු විසඳීමටවත් බලධාරීන් වැඩපිළිවෙළක් සකස් කර නොමැති බවද ලේකම්වරයා සඳහන් කළේය.

වැඩවර්ජනය සිදුකරන කාලය තුළදී Xකිරණ පරීක්ෂා කිරීම්,CT ස්කෑන් පරීක්ෂණ හා MRI පරීක්ෂණ ඇතුළු විකිරණ විද්‍යා තාක්ෂණවේදීන් සිදුකරන කිසිදු විකිරණ පරීක්ෂාවක් සිදුනොකරන බවද හෙතෙම පවසා සිටියේය.