වෑන් රථ අනතුරින් එක් අයෙක් මියගොස් 7ක් රෝහලේ

කිරිඳිවැල, හංවැල්ල මාර්ගයේ තිත්තපත්තර 2 කණුව අසලදී අද (07දා) පෙරවරුවේ සිදුවූ රිය අනතුරින් එක් පුද්ගලයෙකු ජීවිතක‍ෂයට පත්ව හත් දෙනෙකු තුවාල ලබා රෝහල් ගත කර ඇතැයි දොම්පේ පොලීසිය පවසයි.

මෙසේ අනතුරට ලක්ව ඇත්තේ වතුපිටිවල බ්‍රැන්ඩ්‍රික්ස් ආයතනයේ සේවකයන් ප්‍රවාහනය කරමින් තිබූ වෑන් රථයක් හා කිරිඳිවැල සිට හංවැල්ල බලායමින් තිබූ සිමෙන්ති කුඩු රැගත් ලොරියකි.

මෙම අනතුරින් ජීවිතක්‍ෂයට පත්වූයේ, වේයන්ගොඩ බාඳුරාගොඩ පදිංචි කවිඳු සම්පත් කුමාර (අවු.22) නමැත්තෙකි.

තවත් 07 දෙනෙකු රෝහල් ගත කර ඇති අතර තුවාලකරුවන් අතර කාන්තාවන් තිදෙනෙකුද සිටින අතර ගම්පහ රෝහලේ දැඩිසත්කාර ඒකකයේ හා කොළඹ ජාතික රෝහලේ දැඩිසත්කාර ඒකකයේ ප්‍රතිකාර ලබන බව පොලිසිය පවසයි.

අනතුර සම්බන්ධයෙන් ලොරි රථයේ රියදුරු පොලීසිය විසින් අත්අඩංගුවට ගෙන තිබේ.

සිද්ධිය සම්බන්ධයෙන් දොම්පේ පොලීසිය වැඩිදුර පරීක්ෂණ සිදුකරයි.

කිරිඳිවැල - උපාලි රණවීර