ලෝක වාර්තාවක් සම කරමින් රනිල් අද දිවුරුම් දෙයි

ශ්‍රී ලංකා ප්‍රජාතාන්ත්‍රික, සමාජවාදී ජනරජයේ 11 වැනි අගමැතිවරයා ලෙස අද (21දා) දිවුරුම් දීමට නියමිත රනිල් වික්‍රමසිංහ මහතා එම තනතුරට පත්වන්නේ ලෝක වාර්තාවක් සම කරමිනි.

අගමැති තනතුර සිවුවැනි වරටත් හොබවන රනිල් වික්‍රමසිංහ මහතා මෙවර මහ මැතිවරණයට කොළඹ දිස්ත්‍රික්කයෙන් තරග කර මනාප ඡන්ද 500,566 ක් ලබාගත් අතර, එය ශ්‍රී ලංකා මැතිවරණ ඉතිහාසයේ අපේක්ෂකයෙකු ලබාගත් වැඩිම ඡන්ද සංඛ්‍යාව  වේ. 

ඒ අනුව රනිල් වික්‍රමසිංහ මහතා 1993 මැයි 07 වැනිදා සිට 1994 අගෝස්තු 14 වැනිදා දක්වාත්, 2001 දෙසැම්බර් 09 සිට 2004 අප්‍රේල් 06 වැනිදා දක්වාත්, 2015 ජනවාරි 09 වැනිදා සිට මේ දක්වාත් අගමැති ධුරයේ කටයුතු කර තිබේ. 

1977 ජූලි මස 21 වැනිදා පැවැති මහ මැතිවරණයෙන් එවකට ළාබාලම මන්ත්‍රීවරයා ලෙස පාර්ලිමේන්තුවට තේරීපත් වූ රනිල් වික්‍රමසිංහ මහතා මේ දක්වා අඛණ්ඩව පාර්ලිමේන්තුව නියෝජනය කළ එකම පුද්ගලයාද වේ.

නිදහස් ලංකාවේ ප්‍රථම අගමැති ඩී.එස්. සේනානායක මහතාගේ අභාවයෙන් පසු 1952 වසරේ මාර්තු මස 26 වැනිදා අග්‍රාණ්ඩුකාර සෝල්බරි සාමිවරයා විසින් ඩඩ්ලි සේනානායක මහතා අගමැති තනතුරට පත්කරන ලද අතර, එම වසරේම පැවැති මහ මැතිවරණය ජයග්‍රහණය කරමින් ඔහු යළිත් අගමැති තනතුරට පත් වූ අතර, යළි දිවුරුම් දීමක් සිදු නොවූ බැවින් 1960 හා 1965 යන වසරවලද අගමැති තනතුරට පත් වූ ඩඩ්ලි සේනානායක මහතා සැලකෙන්නේ තුන් වරක් දිවුරුම් දුන් අගමැතිවරයෙකු වශයෙනි.

සිවුවරක් අගමැති තනතුරේ දිවුරුම් දුන් ප්‍රථමයා බ්‍රිතාන්‍යයේ විලියම් එවර්ට් ග්ලැඩ්ස්ටන් (1809 – 1898) මහතාය. ලිබරල් පක්ෂය නියෝජනය කළ විලියම් එවර්ට් ග්ලැඩ්ස්ටන් මහතා 1868 වසරේ සිට 1894 වසර දක්වා සිවුවරක් අගමැති තනතුරට පත් විය. මේ අනුව ලෝකයේ මෙවැනි වාර්තාවක් සම කෙරෙන්නේ වසර 121 ක තරම් දීර්ඝ කාලයකට පසුවය.

මේ අනුව සිවුවැනි වරටත් සිදුවන මේ අගමැති පදවිප්‍රාප්තිය දකුණු ආසියානු, ආසියානු පමණක් නොව ජගත් දේශපාලන වංශකතාවේද අතිශය විරල සිදුවීමක් වෙයි.

මෙරට ප්‍රථම අගමැතිවරයා ලෙස මහාමාන්‍ය ඩී.එස්. සේනානායක මහතා කටයුතු කළ අතර, පසුව ඩඩ්ලි සේනානායක, ශ්‍රීමත් ජෝන් කොතලාවල, එස්.ඩබ්.ආර්.ඩී. බණ්ඩාරනායක, ඩබ්ලිව්. දහනායක, සිරිමාවෝ බණ්ඩාරනායක, ආර්. ප්‍රේමදාස, ඩී.බී. විජේතුංග, චන්ද්‍රකා බණ්ඩාරනායක කුමාරතුංග, මහින්ද රාජපක්ෂ, රත්නසිරි වික්‍රමනායක, දි.මු. ජයරත්න යන මහත්ම මහත්මීන් මීට පෙර අගමැති ධුරයේ කටයුතු කර තිබේ.

සිවුවැනි වරට අගමැති පදවියේ දිවුරුම් දෙන රනිල් වික්‍රමසිංහ මහතා කටයුතු කරනුයේ අටවැනි පාර්ලිමේන්තුවේ අගමැතිවරයා ලෙසිනි. එමෙන්ම 19 වැනි ව්‍යවස්ථා සංශෝධනයෙන් පසු මෙරට පත්වන පළමු අගමැතිවරයා වන්නේද වික්‍රමසිංහ මහතාය.