මුලතිව් ධීවරයින්ට මාළු වෙනුවට හඳුනානොගත් යකඩ බෝල

මුලතිව් වෙල්ලමුල්ලි වයික්කාල් මුහුදු තීරයෙන් මුහුදු ගිය ධීවරයින් පිරිසකට ඊයේ (16දා) සවස හඳුනානොගත් කලු පැහැති විශාල යකඩ බෝල 2ක් හමු වී ඇති බව මුලතිව් ධීවර පරික්ෂක කාර්යාලය පවසයි.

 කිලෝ ග්‍රෑම් 25 ක පමණ බරින් යුත් මෙම යකඩ බෝල දෙක කුමන කරුණක් හේතුවෙන් මුලතිව් මුහුදට පැමිණියේද යන්න මෙතෙක් සොයාගෙන නොමැති අතර අදාළ යකඩ බෝල දෙක ධීවරයින් විසින් මුලතිව් ධීවර පරික්ෂක කාර්යාලයට බාර දී ඇත.

යකඩ බෝල දෙක කිසියම් සාගර පරික්ෂණ කටයුත්තක් සඳහා භාවිතා කොට ඇති බවට මුලතිව් ධීවරයින් සැක පළ කරන අතර යකඩ බෝල දෙක කුමක්දැයි යන්න පරික්ෂා කිරීමට බලධාරීන් වෙතට යොමු කිරීමටද මුලතිව් ධීවර පරික්ෂක කාර්යාල නිලධාරීන් පියවර ගෙන ඇත.