මිහින් රක්ෂණ ලංකා බැංකු හා නවලෝක සීෂෙල්ස් වෙත

නිල චාරිකාවක් සඳහා සීෂෙල්ස් වෙත පැමිණ සිටින ජනාධිපති මහින්ද රාජපක්‍ෂ මහතා ඊයේ (28) සවස එරට අගනුවරදී ලංකා බැංකු ශාඛාවක්, ශ‍්‍රී ලංකා රක්‍ෂණ ආයතනයේ කාර්යාලයක් සහ මිහින් ලංකා ගුවන් සේවා කාර්යාලයක් විවෘත කළේය.

ලංකා බැංකු ශාඛාව සහ රක්‍ෂණ ආයතන කාර්යාල වික්ටෝරියා අගනුවර නිදහස් මාවතේ කැපිටල් සිටි ගොඩනැගිල්ලෙහි පිහිටුවා තිබේ.

සීෂෙල්ස් ජනාධිපති ජේම්ස් ඒ. මිෂෙල් මහතා, උප ජනාධිපති ඩැනී ෆෝ, සමාජ කටයුතු, ප‍්‍රජා සංවර්ධන හා ක‍්‍රීඩා ඇමති වින්සන්ට් මෙරිටෝන් යන මහත්වරුද ජනාධිපතිවරයා සමග මේ අවස්ථාවට එක් වූහ. ලංකා බැංකුවේ සභාපති හර්ෂ අබේවික‍්‍රම මහතා, රක්‍ෂණ සංස්ථාවේ අලෙවි අංශයේ සහකාර කළමනාකාරිනී නාමලී සිල්වා මහත්මියද සිය ආයතන නියෝජනය කරමින් පැමිණ සිටියහ.

මිහින් ලංකා කාර්යාලය ෆ‍්‍රැන්සිස් රේචල් මාවතේ ඊබ‍්‍රහිම් ගොඩනැගිල්ලේ පිහිටුවා තිබේ. එය විවෘත කිරීමේ අවස්ථාවට මිහින් ලංකා සභාපති නිශාන්ත රණතුංග මහතා ද එක්ව සිටියේය.

අනතුරුව ජනාධිපතිවරයා විසින් කොළඹ නවලෝක රෝහල් සමූහයේ ශාඛාවක් ද විවෘත කරනු ලැබීය. එය වික්ටෝරියා නුවර ෆ‍්‍රැන්සිස් රේචල් මාවතේ සිටි මාට් ගොඩනැගිල්ලේ ස්ථාපනය කර තිබේ.