මන්ත්‍රීවරුන් 69කට පැන්ෂන් නැතිෙවයිද?

මහජන සාමය හා ක්‍රිස්තියානි කටයුතු අමාත්‍ය ජෝන් අමරතුංග මහතාට එරෙහිව විපක්ෂයෙන් ඉදිරිපත් කර ඇති විශ්වාසභංග යෝජනාව සම්මත වුවහොත් අප්‍රේල් 23 වැනිදාට පෙර ආණ්ඩුව විසුරුවා හැරීමට අගමැති රනිල් වික්‍රමසිංහ මහතා කටයුතු කිරීමේ සූදානමක් ඇතැයි අනාවරණය වෙයි. යම් හෙයකින් එය සිදු වුවහොත් වර්තමාන පාර්ලිමේන්තුවේ මන්ත්‍රීවරුන් 69කට විශ්‍රාම වැටුප් අහිමිවනු ඇත. 
වත්තල ප්‍රාදේශීය සභා සභාපති ඇතුළු එක්සත් ජනතා නිදහස් සන්ධානයේ පිරිසකට පහරදුන් බවට සඳහන් කර විපක්ෂයේ මන්ත්‍රීවරුන් 114 දෙනෙකුගේ අත්සනින් යුතුව ජෝන් අමරතුංග මහතාට එරෙහිව විශ්වාසභංග යෝජනාව කථානායක චමල් රාජපක්ෂ මහතාට මේ වනවිට බාර දී තිබේ.  මේ ආකාරයට ඉදිරිපත් කර ඇති විශ්වාසභංග යෝජනාව සම්මත වුවහොත් පාර්ලිමේන්තුව අප්‍රේල් 23 වැනිදාට පෙර විසුරුවීමට කටයුතු කරන බවට අගමැතිවරයා පවසා තිබෙන නිසා පාර්ලිමේන්තුව 
විසුරුවා හැරියහොත් 2010 වසරේදී පළමු වරට පාර්ලිමේන්තුවට පැමිණි සියලුම මන්ත්‍රීවරුන්ට විශ්‍රාම වැටුප අහිමි වී යයි. 
පාර්ලිමේන්තු මන්ත්‍රීවරුන්ට ලබාදෙන විශ්‍රාම වැටුපට හිමිකම් කීමට මන්ත්‍රීවරයෙකු වසර 05 ක් පාර්ලිමේන්තුව තුළ රැඳී සිටිය යුතු අතර, 2010 වසරේදී පාර්ලිමේන්තුවට අභිනවයෙන් පත්වූ මන්ත්‍රීවරුන් 82 කගේ වසර 05 ක කාලය සම්පූර්ණ වන්නේ එළඹෙන අප්‍රේල් 22 වැනිදාය.
මේ පිළිබඳව සලකා බලා නව ජනාධිපතිවරයෙකු පත්වුවහොත් පාර්ලිමේන්තුව විසුරුවා හැරීමට කටයුතු නොකර අප්‍රේල් 23 වැනිදා පාර්ලිමේන්තුව විසුරුවා හැරීමට කටයුතු කරන බව අග්‍රාමාත්‍ය රනිල් වික්‍රමසිංහ මහතා මීට පෙර ප්‍රතිඥාවක් ලබාදී තිබුණි.