මත්පැන් වැටලීමට ගිය සුරාබදු නිලධාරීන්ට පිරිසක් පහරදෙයි

මහියංගනය, කෙසෙල්පොත, කොලේයාය ගම්මානයේ මත්පැන් වැටලීමකට පැමිණි බදුල්ල සුරාබදු ඒකකයේ නිලධාරීන් පිරිසකට අද (10දා) අලුයම 5.30ට පමණ කිසියම් පිරිසක් විසින් පහරදී ඇතැයි මහියංගන පොලීසිය සඳහන් කරයි.

ප්‍රහාරයට ලක්වීම හේතුවෙන් තුවාල ලැබූ සුරාබදු ඒකකයේ නිලධාරීන් දෙදෙනෙකු ප්‍රතිකාර සඳහා මහියංගන මූලික රෝහලට ඇතුළත් කර ඇති බවද පොලීසිය පවසයි.

පොලීසියට ලැබුණ පැමිණිල්ලක් මත මෙම මත්ද්‍රව්‍ය වැටලීම සුරාබදු ඒකකයේ නිලධාරින් 8 දෙනෙකුගෙන් සමන්විත කණ්ඩායමක් විසින් සිදුකර ඇති අතර, එහිදී එක් පුද්ගලයෙකු සන්තකයේ තිබී ගංජා අත්අඩංගුවට ගත් බවත් පොලීසිය සඳහන් කරයි.

ඒ අනුව නීතිවිරෝධී මත්පැන් සොයා මෙහෙයුම් සිදුකරන අතරතුර එහිවූ තරුණයන් පිරිසක් මෙහිදී සුරාබදු ඒකකයේ නිලධාරීන්ට පහරදී ඇති අතර, වහාම ක්‍රියාත්මක වූ පොලිස් නිලධාරීන් සිදුවීමට අදාළ පුද්ගලයන් අත්අඩංගුවට ගෙන ඇති බවත් ඔවුන් මහියංගන මහේස්ත්‍රාත් අධිකරණය වෙත ඉදිරිපත් කිරීමට නියමිතව ඇති බවත් මහියංගනය පොලීසිය වැඩිදුරටත් සඳහන් කරයි.

රංජිත් කරුණාවිර