නානුඔය කලහකාරී සිදුවීම සම්බන්ධයෙන් 05ක් අත්අඩංගුවට

නානුඔය නගරයේ කහ ඉරක් මතදී ලොරි රථයක වැදී පාසල් දැරියක් මිය යෑමේ සිද්ධිය මත ඇතිවූ කළහකාරී සිද්ධිය සම්බන්ධයෙන් සැකපිට පුද්ගලයන් පස් දෙනෙකු අද (20දා) අත්අඩංගුවට ගත් බව  නුවරඑළිය පොලීසිය පවසයි.

ඉකුත් 15 දා උදෑසන මෙම අනතුර සිදුවූ අතර, ඉන්පසු එම ස්ථානයට රැස්වූ විශාල පිරිසක් අනතුර සිදුකරන ලද ලොරි රථයට ගිනි තබා මාධ්‍ය‍වේදීන් සතු කැමරා උපකරණවලට අලාභ හානි සිදුකර පැය හයකට අධික කාලයක් නුවරඑළිය - හැටන් මාර්ගය වසා කළහකාරී ලෙස උද්ඝෝෂණයේ නිරතවිණි.

 නානුඔය නගරයේ ත්‍රිරෝද රථ රියදුරන් තිදෙනෙකු,  පුද්ගලික බස් රථ කොන්දොස්තරවරයෙකු හා රදැල්ල වත්තේ පහළ කොටසේ පදිංචි අයෙකු මෙසේ සැකපිට අත්අඩංගුවට ගෙන තිබේ.

මෙම ගැටුම්කාරී සිද්ධිය සම්බන්ධයෙන් තවත් පුද්ගලයන් රැසක් අත්අඩංගුවට ගැනීමට පරීක්ෂණ ආරම්භ කර ඇති බවත්, ඔවුන්ද ඉදිරියේදී අත්අඩංගුවට ගැනීමට පියවර ගන්නා බව නුවරඑළිය පොලීසිය පවසයි.

ශාන් හුලංනුගේ