දින 100 අපේක්ෂක කණ්ඩායමේ වැඩක්

ජනාධිපතිවරණයේදී මෛත්‍රීපාල සිරිසේන පොදු අපේක්ෂක පාර්ශ්වය ඉදිරිපත්කළ දින 100 වැඩපිළිවෙළ පොදු අපේක්ෂක කණ්ඩායම එක්ව සකස්කළ එකක් බවත්, එය තනිපුද්ගලයෙකු විසින් සකස් කරන ලද ලියවිල්ලක් නොවන බවත් පාර්ලිමේන්තු මන්ත්‍රී ජයම්පති වික්‍රමරත්න මහතා 'අද' පුවත්පතට පැවසීය.

දින 100 වැඩපිළිවෙළ ප්‍රකාශයට පත්කිරීමට ප්‍රථම ඒ පිළිබඳ සාකච්ඡාකළ අවසන් සාකච්ඡාවට පොදු අපේක්ෂක ලෙස ඉදිරිපත් වූ ජනාධිපති මෛත්‍රීපාල  සිරිසේන මහතාද සහභාගි වූ බවත්, එම වැඩපිළිවෙළ වාක්‍යයෙන් වාක්‍යය සාකච්ඡා කළ බවත් ජයම්පති වික්‍රමරත්න මහතා කීවේය.

අපවත්වී වදාල පූජ්‍ය මාදුළුවාවේ සෝභිත හිමියන්ගේ 76 වැනි ජන්ම දින සැමරුම් උත්සවය පැවැති පෙරේදා(30දා) ජනාධිපති මෛත්‍රීපාල සිරිසේන මහතා දින 100 වැඩපිළිවෙළ සම්බන්ධයෙන් සිදුකළ ප්‍රකාශ සම්බන්ධයෙන් 'අද' පුවත්පත වික්‍රමරත්න මන්ත්‍රීවරයාගෙන් විමසූ අවස්ථාවේදී ඔහු මේබව කීය.

පොදු අපේක්ෂකයා තෝරාගැනීමටත් පෙර සිටම දින 100 වැඩපිළිවෙළ සම්බන්ධයෙන් අදහසක් පැවැති අතර, එය මුලින්ම ඉදිරිපත් කළේ පූජ්‍ය මාදුළුවාවේ සෝභිත නාහිමියන් ප්‍රමුඛ සාධාරණ සමාජයක් සඳහා ජාතික ව්‍යාපාරය විසින් බවද මන්ත්‍රීවරයා පැවසීය.

මාදුළුවාවේ සෝභිත හිමි ඇතුළු පිරිස ඉදිරිපත්කළ එම වැඩපිළිවෙළ 180ක වැඩපිළිවෙළක් වූ බවත්, පසුව එක්සත් ජාතික පක්ෂයේ යෝජනාව අනුව එය දින 100 දක්වා අඩුකළ බවත් ජයම්පති වික්‍රමරත්න මන්ත්‍රීවරයා ප්‍රකාශ කළේය.