ඩොනල්ඩ් ට්‍රම්ප් සිය ව්‍යාපාර දිවියට තිත තැබීමට සූදානම්

ජනාධිපති ධුරයේ කටයුතු කෙරෙහි පූර්ණ අවධානය යොමුකිරීම සඳහා තමන් සියලු ව්‍යාපාරික කටයුතුවලින් ඉවත්වන බව ඩොනල්ඩ් ට්‍රම්ප් පවසයි.

ඇමෙරිකාවේ නව ජනාධිපතිවරයා ලෙස පසුගියදා පැවති මැතිවරණයෙන් තේරීපත් ඩොනල්ඩ් ට්‍රම්ප් පවසන්නේ මේ ව්‍යාපාරික දිවියේ හා රාජ්‍ය පාලනයේ ගැටුමක් ඇතිවීම වළක්වනු වස් මෙම තීරණයට පැමිණි බවයි.

ට්විටර් පණිවුඩ කිහිපයක් නිකුත් කරමින් මේ පිළිබඳව තේරීපත් ඇමෙරිකානු ජනාධිපතිවරයා මෙම අනාවරණය සිදුකරන අතර, එළැඹෙන මාසයේදී සිය දරුවන් සමග එක්ව පවත්වන මාධ්‍ය හමුවකදී තමාගේ ඉදිරි සැලසුම් පිළිබඳව තවදුරටත් පැහැදිලි කිරීම් සිදුකරන බවද ට්‍රම්ප් පවසයි.

කෙසේ වෙතත්, තම ව්‍යාපාරික දිවිය හා ජනාධිපති ධුරය සමබරව පවත්වා ගැනීමක් සම්බන්ධයෙන් ඩොනල්ඩ් ට්‍රම්ප් ඉඟි කර තිබුණත්, එවැනි මතයක් නොමැති බව මේ හරහා ඩොනල්ඩ් ට්‍රම්ප් සපථ කර තිබේ.