ජනපතිවරණයට ඇලෝසියස්ගෙන් මුදල් ගෙන ඇත්නම් ප්‍රකාශයක් කරන්න

අර්ජුන් ඇලෝසියස්ගෙන් හෝ ඔහුට සම්බන්ධ සමාගම්වලින් 2015 ජනාධිපතිවරණය සඳහා මුදල් ලබාගෙන ඇත්නම් හෝ එම සමාගම්වලින් මුදල් ලබාගෙන නොමැති නම් ඒ පිළිබඳව ප්‍රකාශයක් කරන ලෙස පාරිභෝගික අයිතීන් සුරැකීමේ ජාතික ව්‍යාපාරය ජනාධිපතිවරයා වෙත ලිපියක් යොමු කරමින් දන්වා සිටියි.

දූෂිත බැඳුම්කර ගනුදෙනුවට සම්බන්ධ අර්ජුන් ඇලෝසියස්ට අයත් සමාගම් කිහිපයකින් දේශපාලකයන්ගේ මැතිවරණ ව්‍යාපාර සඳහා මුදල් ලබාගත් බවට මේ වනවිට සමාජයේ දැඩි කතාබහක් ඇතිවී ඇති බවත් ඒ අනුව තමන්ගේ මැතිවරණ කටයුතු සඳහා අර්ජුන් ඇලෝසියස්ට අයත් සමාගමකින් මුදල් ලබා ගත් බව දේශපාලකයන් කිහිප දෙනෙකු මේ වන විටත් පිළිගෙන තිබේ.

එමෙන්ම පසුගිය  ජනාධිපතිවරණය සඳහාද අර්ජුන් ඇලෝසියස්ට අයත්  සමාගම්වලින් මුදල් ලබාගෙන තිබීමට හැකියාවක් ඇති බව අමාත්‍ය සරත් ‌ෆොන්සේකා මහතා මාධ්‍යට ප්‍රකාශ කර ඇති බවත් ඒ අනුව ඒ පිළිබඳව ප්‍රකාශයක් කරන ලෙස පාරිභෝගික අයිතීන් සුරැකීමේ ජාතික ව්‍යාපාරය ජනාධිපතිවරයාගෙන් ඉල්ලා සිටියි.