ජනපති මන්දිරයේ මසක වියදම මිලියන 15

ජනපති මන්දිරයේ ජලය, විදුලිය හා නඩත්තු කටයුතු සඳහා මසකට රුපියල් මිලියන 15 ක වියදමක් දැරීමට රජයට සිදුවන බවත් එහෙයින් එහි පදිංචිය ජනපති මෛත්‍රීපාල සිරිසේන මහතා විසින් ප්‍රතික්ෂේප කර ඇති බවත් ජනපති ලේකම් පී.බී. අබේකෝන් මහතා නිවේදනයක් නිකුත් කරමින් සඳහන් කරයි.

ඒ අනුව පැරණි නිවාස දෙකක් එක්කර ජනපතිවරයෙකුගේ පරිහරණය සඳහා උචිත අයුරින් නවීකරණය කිරීමට සිදු වූ බව ඔහු සඳහන් කරයි.

ජනපති නිල නිවස ප්‍රතිසංස්කරණය කිරීම සඳහා රුපියල් මිලියන 180 ක් වෙන් කර තිබෙන බවට වාර්තා වන තොරතරු පිළිබඳව මාධ්‍ය වෙත පැහැදිලි කිරීමක් කරමින් ඔහු මේ බව සඳහන් කළේය.

නිවසේ ආරක්ෂාව සඳහා, ජනාධිපතිවරයාගේ ආරක්ෂාව සඳහා වන නිලධාරීන්ගේ නේවාසික පහසුකම් සඳහා මෙන්ම ගරාජයද ප්‍රතිසංස්කරණය කිරීමට සිදු වූ බවද ජනපති ලේකම්වරයා පවසයි.

එසේම බී.එම්.ඩබ්ලිව් මෝටර් රථය හා ආරක්ෂක අංශ සඳහා බී.එම්.ඩබ්ලිව් යතුරු පැදි අණවුම් කළේ පසුගිය රජය විසින් පසුගිය වසරේ ඔක්තෝබර් මාසයේදී බවත්, ඒවා ප්‍රතිඅපනය කළ නොහැකි වීම නිසාත්, වරායේ තබා ගැනීම වෙනුවෙන් ගුදම් ගාස්තු ඉහළ යන නිසාත් ආදාළ මෝටර් රථය හා යතුරු පැදි රජයට පවරා ගැනිමට සිදු වූ බවත් එම නිවේදනයේ වැඩිදුරටත් දැක්වෙයි.