ගුවන් හමුදාව ජර්මන් කතකගේ දිවිබේරයි

නකල්ස් කඳුවැටි ප‍්‍රදේශයේ ඊයේ (25දා) දහවල් 01. 35 ට පමණ අතුරුදන් වූ ජර්මන් ජාතික කාන්තාවකගේ දිවි බේරාගැනීමට ශ‍්‍රී ලංකා ගුවන් හමුදාවට හැකිවිය. ශ‍්‍රී ලංකා පොලීසිය, ගුවන් හමුදාවෙන් කරන ලද විශේෂ ඉල්ලීමක් මත මෙම අතුරුදන් වූ කාන්තාව පිළිබඳව සොයා සෝදිසි මෙහෙයුම දියත් කෙරිණි.

ගුවන් හමුදා රෙජිමේන්තු විශේෂ බළකායේ කණ්ඩායමක්, ගුවන් අවිකරු සාමාජිකයෙකු හා ශ‍්‍රී ලංකා පොලිස් නිලධාරියෙකු මේ සඳහා දායක වූ අතර, ඒ සඳහා හිඟුරක්ගොඩ කඳවුරු මූලස්ථානයෙන් 7 වැනි බළගණයට අයත් බෙල් 212 හෙලිකොප්ටර් යානයක්ද ගෙන්වා තිබුණි.

නමුත් ගුවනින් නකල්ස් කඳුවැටි ප‍්‍රදේශයේ විනාඩි 30ක් පමණ මෙහෙයුමක් දියත් කළත්, එම අවස්ථාවේ පැවැති අධික සුළං තත්ත්වයත්, අයහපත් කාලගුණයත් හේතුවෙන් හෙලිකොප්ටර් යානය හැසිරවීම අසීරු වූ බැවින් ගුවන් යානය ආරක්‍ෂිත ස්ථානයක ගොඩබස්සවා ගුවනින් මෙහෙයුම තාවකාලිකව නවතා දැමීමට සිදුවිය.

කෙසේ නමුත් ගොඩබිම් මෙහෙයුමේ දී අතුරුදන් වූ කාන්තාව ඊයේ දිනයේදීම සොයාගැනීමට හැකිවූ අතර, මේ වනවිට ඇය විශේෂ වෛද්‍ය ප‍්‍රතිකාර සඳහා යොමුකර ඇත.