ගලේවෙල රිය අනතුරෙන් යුද හමුදා සෙබළුන් 02ක් මරුට

ගලේවෙල දඹුල්ල ප්‍රධාන මාර්ගයේ පුවක්පිටිය ප්‍රදේශයේදී ත්‍රිරෝද රථයක් සහ ටිපර්  රථයක් මුහුණට මුහුණ ගැටීමෙන් සිදු වූ අනතුරෙන් හමුදා සෙබළුන් දෙදෙනෙකු ජීවිතක්ෂයට පත්ව අයෙකු බරපතළ තුවාල ලබා රෝහල්ගත කර ඇති බව ගලේවල පොලීසිය පවසයි.

අනතුරෙන් ජීවිතක්ෂයට පත්ව ඇත්තේ ගලේවෙල යටිගල්පොත්ත ප්‍රදේශයේ පදිංචි සමිත් මධුරංග ඒකනායක (23) සහ  සුපුන් කල්හාර  රාජතිලක (22) යන යුද හමුදාවේ දියතලාව ප්‍රදේශයේ කඳවුරකට අනියුක්තව  සේවයේ නියුතු  නිලධාරීන් දෙදෙනෙකි.

ත්‍රිරෝද රථය තවත් මෝටර් රථයකට  ඉස්සර කිරීමට යාමේදී  ඉදිරියෙන් පැමිණි  ටිපර් රථයේ  මුහුණට මුහුණ ගැටී මෙම අනතුර සිදුව තිබේ.

 අනතුරින් යුද හමුදා සෙබළුන් දෙදෙනා එම ස්ථානයේදීම මියගොස් ඇති අතර තුවාල ලැබූ අනෙක් පුද්ගලයා ගලේවෙල ප්‍රාදේශීය රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා කුරුණෑගල මහ රෝහලට මාරු කර යවා තිබේ. වැඩිදුර විමර්ශන ගලේවෙල පොලීසිය සිදු කරයි.