ගම්මන්පිල සියල්ල ඉවත්කරගනී

බස්නාහිර පළාත් කෘෂිකර්ම, සංස්කෘතික හා පරිසර අමාත්‍ය ධුරයෙන් ඊයේ (18දා) ඉල්ලා අස්වූ උදය ප්‍රභාත් ගම්මන්පිල මහතාගේ අමාත්‍යාංශයේ පෞද්ගලික කාර්යමණ්ඩලය සතු බඩු බාහිරාදිය මේ වනවිට ඉවත්කෙරෙමින් පවතින බව වාර්තා වේ.

ගම්මන්පිල මහතා මෙතෙක් ඇමතිවරයා වශයෙන් භාවිත කළ මොන්ටේරෝ රථය සහ පරිගණක, දුරකථන සහ කැමරා ආදිය මේ වනවිට භාර දී තිබෙන බවත්, නිල කාමරයේ ඇති අනෙකුත් උපකරණද ඉවත් කෙරෙමින් පවතින බවත් එහි ප්‍රකාශකයෙක් පැවසීය.

එසේම ගම්මන්පිල මහතාගේ පෞද්ගලික කාර්යමණ්ඩලයේ සිටි පෞද්ගලික ලේකම්, සම්බන්ධීකරණ ලේකම්, මහජන සම්බන්ධතා නිලධාරී, මාධ්‍ය ලේකම්, පෞද්ගලික සම්බන්ධීකාරක යන නිලධාරීන්, කළමනාකරණ සහකාරවරුන් තිදෙනා, කාර්යාල කාර්ය සහායකයන් දෙදෙනා සහ රියදුරන් දෙදෙනාද අද දින ඉවත්වීමට නියමිතය.