කලුතර සිදුවීම විමර්ශනයට පොලිස් නිල සුනඛ සහයත්

පානදුර මොරගහහේන ප්‍රදේශයේ අතහැර දමාගොස් තිබියදී  ඊයේ (28දා) හමුවූ වෑන්රථය පැහැර ගත් එකක් බවට මූලික පොලිස් පරීක්ෂණවලදී හෙළිවී ඇති බව පොලිස් මූලස්ථානය සඳහන් කරයි.

කටුනායක ගුවන්තොටුපොළට කුලී ගමනක් යන මුවාවෙන් මෙය රැගෙන ගොස් මරදාන ප්‍රදේශයේදී මෙය පැහැරගෙන ඇති බවට  තොරතුරු ලැබී ඇති බවද ‍පොලිස් මූලස්ථානය පවසයි.

මෙම වෑන්රථයේ තිබී සොයාගත් අත් ආවරණයක් අනුව පොලිස් නිල සුනඛ අංශය මගින් සිදුකළ විමර්ශනවලදී වෑන් රථය නවතා දැමූ ප්‍රදේශයේ ඇති අත්හැරදමන ලද තේ කර්මාන්ත ශාලාවක් මේ වන විට පූර්ණ පරීක්ෂාවට ලක්වන බව පොලිස් මූලස්ථානය සඳහන් කරයි.

කලුතර බන්ධනාගාර බස්රථවලට පසුගිය (27දා) එල්ලවූ ප්‍රහාරයට සම්බන්ධව සැකකරුවන් භාවිත කළ වාහන 2කම සොයාගෙන ඇති බව පොලිස් මූලස්ථානය සඳහන් කරයි.

ඒ අනුව ඉතා කෙටි කාලයක් තුළ සිද්ධියට සම්බන්ධ සියලු සැකකරුවන් අත්අඩංගුවට ගත හැකි වන බවට  මූලස්ථානය වැඩිදුරටත් සඳහන් කරයි.