කටුනායක ධාවන පථය අලුත්වැඩියාව චීනයෙන්

කටුනායක බණ්ඩාරනායක ජාත්‍යන්තර ගුවන් තොටුපළ ධාවන පථය නවීකරණය කිරීම හේතුවෙන් ජනවාරි 06 සිට අප්‍රේල් 05 දක්වා මාස තුනක කාලයක් දහවල් කාලයේ ගුවන් මෙහෙයුම් කටයුතු අත්හිටුවීමට තීරණය කර ඇතැයි ප්‍රවාහන හා සිවිල් ගුවන් සේවා අමාත්‍ය නිමල් සිරිපාල ද සිල්වා  මහතා පැවසීය.

හෙතෙම මේ බව පැවසුවේ, අද (22දා) කටුනායක බණ්ඩාරනායක ජාත්‍යන්තර ගුවන්තොටුපළෙදී පැවැති මාධ්‍ය හමුවකදීය.

වර්තමානයේ ජාත්‍යන්තර ගුවන් සේවා සමාගම් 28 ක් දිනකට ගුවන් ගමන් වාර 177 ක් කටුනායක සිට ක්‍රියාත්මක කරන බවත්, ඒ හරහා දිනයකට මගීන් 25,000 ක් හා භාණ්ඩ මෙට්‍රේක් ටොන් 300 ක් හසුරවන බවත් අමාත්‍යවරයා මෙහිදී ප්‍රකාශ කළේය.

නවීකරණ කටයුතු සඳහා ඩොලර් මිලියන 41 ක් වැය වන බවත් එය චීන සමාගමකට පවරා ඇති බවත් අමාත්‍යවරයා සඳහන් කළේය. නවීකරණය කිරීමෙන් පසුව ධාවන පථය දිගින් හා පළලින් වැඩි වෙයි.

ඒ හරහා ලොව විශාලතම A-380 එයා බස් යානා කටුනායකට ගොඩ බැස්සවීමට අවස්ථාව ලැබෙන බවත්, නවීකරණය කිරීමෙන් පසුව ධාවන පථය වසර 30 ක කාලයක් භාවිත කළ හැකි බවත් අමාත්‍යවරයා සඳහන් කළේය.

නවීකරණය උදෑසන 8.30  සිට පස්වරු 4.30 දක්වා පැය 8 ක කාලයක්  සිදුවෙන හෙයින් එම කාලය තුළදී ගුවන් ගමන් සිදු නොවෙයි.

එසේම දහවල් ක්‍රියාත්මක වූ ගුවන් ගමන් වාර රාත්‍රී කාලයට යොදා ඇත. අලුත්වැඩියා හේතුවෙන් ශ්‍රී ලන්කන් ගුවන් සමාගමට දැඩි බලපෑමක් ඇතිවිය හැකි බව හෙතෙම සඳහන් කරයි.

කටුනායකට විකල්පයක් ලෙස  මත්තල ගුවන් තොටුපළ භාවිත කල නොහැක්කේ එහි යටිතල පහසුකම් ප්‍රමාණවත් නොමැති බවද අමාත්‍යවරයා සඳහන් කළේය. කෙසේ වෙතත් ශ්‍රී ලන්කන් ගුවන් සමාගම මත්තල සිට චීනය බලා සතියකට යන ගුවන් ගමන් වාර 8 ක් ක්‍රියාත්මක කිරීමට සැලසුම් කර තිබේ.

ගුවන් තොටුපළ අලුත්වැඩියා කරන කාලසීමාවේදී විශේෂිත වාහන සැලැස්මක් ගුවන් තොටුපළ අවට ක්‍රියාත්මක කරන බවද නිමල් සිරිපාල ද සිල්වා මහතා වැඩිදුරටත් පැවසීය.