ඔෟෂධ ලියාපදිංචි කිරීමේ ගාස්තු ඉහළට

ඖෂධ, වෛද්‍ය උපකරණ සහ සීමාස්ත නිෂ්පාදන ලියාපදිංචි කිරීමේදී අය කරන ගාස්තු ඊයේ (14දා) මධ්‍යම රාත්‍රියේ සිට ක්‍රියාත්මක වන පරිදි ජාතික ඖෂධ නියාමන අධිකාරිය විසින් සංශෝධනය කළ බවට සෞඛ්‍ය, පෝෂණ හා දේශීය වෛද්‍ය අමාත්‍යාංශය ප්‍රකාශ කරයි.

අමාත්‍යාංශය සඳහන් කර සිටින්නේ ඖෂධ, වෛද්‍ය උපකරණ සහ සීමාස්ත නිෂ්පාදන ලියාපදිංචි ඉල්ලුම් පත්‍රය ලැබීමෙන් පසු එය ලියාපදිංචි කිරීමේ සහතිකය නිකුත් කරනතුරු අය කරන ගාස්තු මෙහිදී සංශෝධනය කර ඇති අතර, බාහිර පාර්ශ්වවලින් විශේෂඥ දැනුම ලබාගැනීමේදී ගෙවීමට සිදුවන වියදම්ද ඊට ඇතුළත් කර ඇති බවයි.

ඒ අනුව, ඖෂධ සහ වෛද්‍ය උපකරණ නිෂ්පාදනයේ යෙදෙන දේශීය සහ විදේශීය සමාගම් අදාළ ගාස්තු ඇමෙරිකානු ඩොලර්වලින් හෝ ඊට අනුරූප ශ්‍රී ලංකා මුදල්වලින් ගෙවිය යුතු බවද පැවසෙයි.

කෙසේවුවද, අදාළ ගාස්තු සංශෝධනය පිළිබඳ 0112695173 යන දුරකථන අංකය ඔස්සේ ජාතික ඖෂධ නියාමනඅධිකාරිය අමතා තොරතුරු ලබාගත හැකි බවත් අමාත්‍යාංශය සඳහන් කර සිටියි.

වසර 08කට පසුව සංශෝධනය කර ඇති මෙම ලියාපදිංචි කිරීමේ ගාස්තු මීට පෙර සංශෝධනය කර ඇත්තේ 2009 වසරේදීය.