අධිවේගයේ වෑන් රථයක් ගිනි ගනී

දක්ෂිණ අධිවේගී මාර්ගයේ ගාල්ල සිට කඩවත දෙසට ධාවනය වූ වෑන් රථයක් කුරුඳුගහහැතැක්ම ප්‍රදේශයේදී ගිනිගෙන මුළුමනින්ම විනාශ වී ඇතැයි කුරුඳුගහහැතැක්ම පොලිස් මුරපොළ සඳහන් කරයි.

වෑන් රථය තුළ ඇතිවූ කාර්මික දෝෂයක් මත මෙසේ ගිනි ගෙන ඇතැයි පොලීසිය පවසයි.

රියදුරු ඇතුළු විදේශීය ජාතික යුවළක් හා ඔවුන්ගේ දරුවන් දෙදෙනෙකු මෙම රථයේ ගමන් කර ඇති අතර, ඔවුන්ට කිසිදු අනතුරක් සිදුව නොමැත.

සිද්ධිය සම්බන්ධයෙන් කුරුඳුගහහැතැක්ම පොලිස් මුරපොළ වැඩිදුර විමර්ශන කටයුතු සිදුකරයි.