අතුරුදන්වීම් වලින් වැඩි වගකීම LTTE යට පවරයි

යුදමය කාලසීමාවේ සිදුවූ අතුරුදන්වීම් පිළිබඳව සොයාබැලීම සඳහා පත්කළ ජනපති කොමිසමට සාක්ෂි දුන් පුද්ගලයින්ගෙන් 60%කට ආසන් ප්‍රමාණයක් එල්.ටී.ටී.ඊ, සංවිධානය අදාළ අතුරුදන්වීම් සඳහා වගකිව යුතු බවට සඳහන් කර ඇතැයි කොමිසන් සභාවේ සභාපති ලෙස කටයුතු කළ විශ්‍රාමගත් විනිසුරු මැක්ස්වෙල් පරණගම මහතා කියයි.

ඉන්දියාවේ ඉන්දියන් එක්ස්ප්‍රස් පුවත් සේවයට අදහස් දක්වා සිටින පරණගම මහතා තවදුරටත් සඳහන් කර තිබෙන්නේ අතුරුදන්වීම් වලින් 30%ක් පිළිබඳව ශ්‍රී ලංකා ආරක්ෂක අංශ වෙතටත්, 10%ක් අනෙකුත් එල්.ටී.ටී.ඊ. නොවන අනෙකුත් ද්‍රවිඩ කණ්ඩායම් වෙතටත් චෝදනා එල්ල වී තිබෙන බවයි.

මෙම කොමිසම හමුවේ උතුරු හා නැගෙනහිර පළාතේ 2500ක් පමණ වූ ජනතාව සාක්ෂි ලබාදී තිබේ.  කෙසේ වෙතත් ඉහතකී ප්‍රතිශත දිස්ත්‍රික්කයෙන් දිස්ත්‍රික්කයට වෙනස් වන බවත් පරණගම මහතා සඳහන් කරයි. කිලිනොච්චි දිස්ත්‍රික්කයේ 85%ක්, මුලතිව් දිස්ත්‍රික්කයේ 80%ක් අතුරුදන්වීම් පිළිබඳව වන වගකීම එල්.ටී.ටී.ඊ. සංවිධානයට බැර කරන විට. යාපනයේ 50%ක් එම සංවිධානයටත් 50%ක් ආරක්ෂක අංශවෙතටත් බැරකර තිබේ. 

මෙම කොමිසන් සභා වාර්තාව ජනපති මෛත්‍රීපාල සිරිසේන මහතා වෙත පිළිගන්වා තිබෙන බවද එම පුවත්සේවය වාර්තා කරයි.