අගමැති තීරණයක් ගත යුතුයි - ඇමති සුජීව නිහඬතාව බිඳියි

එක්සත් ජාතික පක්ෂයේ සැබෑ වෙනසක් සිදුනොවන බවට විශ්වාසයක් තිබුණ බවත්, පක්ෂයේ ප්‍රතිරූපය සම්බන්ධයෙන් අග්‍රාමාත්‍ය රනිල් වික්‍රමසිංහ මහතා තීරණයක් ගත යුතු බවත් රාජ්‍ය අමාත්‍ය සුජීව සේනසිංහ මහතා පවසයි.

ඇමෙරිකාවේ සිට අද (27දා) දිවයිනට පැමිණි අවස්ථාවේදී ආමාත්‍යවරයා මෙම අදහස් දැක්වූ අතර, ඔහු පක්ෂයේ නව නිලධාරී මණ්ලයට විරුද්ධ බවද ප්‍රකාශ කළේය. එසේම පක්ෂය තුළ තවදුරටත් තමා සටන් නොකරන බවදඒ මහතාකීය.

“අගමැතිතුමත් සමග ඒක මම සාකච්ඡා කළා. මම කිව්වා විශ්වාස කරන්නේ නෑ පැහැදිලි වෙනසක් කියලා. එක්සත් ජාතික පක්ෂයේ අපි තීන්දුවක් ගන්න ඕන තනි පුද්ගලයෙක් ආරක්ෂා කරන්නද? සුළු පිරිසක්  ආරක්ෂා කරන්නද කියලා. මේ අන්තිම අවස්ථාව. මේ අවස්ථාවේදී බොරු කරලා ඔළු ගෙඩි මාරුකරලා මේක කරගෙන යන්න ගියොත් විශාල විනාශයක්. මම හිතන්නේ දැනටමත් විනාශ වෙලා තියෙන්නේ විශාල ප්‍රමාණයක් පක්ෂයේ.

මේක නායකතුමත් එක්ක මම අවුරුදු හතක් කතා කළා. අපටත් වෙහෙසයි. මොකද විරුද්ධව කතා කරන්න කරන්න අපට පක්ෂය තුළ ඉන්න බැරි වාතාවරණයක් බිහිවෙනවා.

හැබැයි පක්ෂය තවදුරටත් කරගෙන යන්න බැරි තරමටම අපි හෙම්බත් වෙලා ඉන්නේ පක්ෂයේ තියෙන අඩුපාඩු නිසා.අපේ සටන් කිරීමේ ශක්තිය හීන වෙලා තියෙන්නේ. පක්ෂය තුළ සටන් කරන එක ලේසි පහසු දෙයක් නෙමෙයි. මොකද නොයෙකුත් දුක්ගැහැටවලට, පළිගැනීම්වලට මුහුණදෙන්න වෙලා තියෙනවා අවුරුදු ගාණක් තිස්සේ.මම වැඩිදුරටත් සටන් කරන්නේ නෑ. බලාගෙන ඉන්නවා.

මම විරුද්ධත්වය ප්‍රකාශ කරනවා. මෙකද මට විශ්වාසයක් තිබුණා මේ වෙනස සිදුවෙන්නේ නෑ කියලා. පොරොන්දු ගොඩක් අවුරුදු ගාණක් දීලා තියෙනවා. කමිටු පත්කරන එකයි ඔළු මාරු කරන එකයි තමයි ගොඩක් වෙලාවට ඉවර වෙලා තියෙන්නේ. පිළිකාව හොයාගන්නේ නැතිව උණටයි හෙම්බරිස්සාවටයි බෙහෙත් කරලා හරි යන්නේ නෑ. පක්ෂයේ ප්‍රතිරූපය සම්බන්ධයෙන් රනිල් වික්‍රමසිංහ මහතා තීන්දුවක් ගත යුතු බවයි අපේ අදහස. මේවා අල්ලගෙන පෙරේතකමට හිටියොත් රටත් පක්ෂයත් විනාශ වෙනවා.”