23 දින සිට මුහුදු බඩ දුම්රිය මාර්ගයේ කොටසක් වසයි

මුහුදුබඩ දුම්රිය මාර්ගයේ දෙහිවල - වැල්ලවත්ත අතර  ප්‍රදේශයේ දුම්රිය ගමනාගමනය මෙම මස 23 දින සිට 27 දා දක්වා සීමා කරන බව දුම්රිය දෙපාර්තමේන්තුව නිවේදනයක් නිකුත් කරමින් සඳහන් කරයි.

එම ප්‍රදේශයේ දුම්රිය පාලමක් සවිකිරීම හේතුවෙන් මෙම පියවර ගෙන තිබේ. මේ අනුව 23 වන දින රාත්‍රී 10.00 සිට 27 දින පෙ.ව 04.00 දක්වා කාලය එම මාර්ගය වසා තබන බව එම නිවේදනයේ සඳහන් වේ.

මේ කාලය තුළ මාතර‚ ගාල්ල‚ අලුත්ගම සිට කොළඹ දෙසට පැමිණෙන දුම්රිය දෙහිවල දුම්රිය ස්ථානය දක්වාත්‚ කොළඹ සිට මාතර‚ ගාල්ල‚ අලුත්ගම දක්වා ගමන් ගන්නා දුම්රිය වැල්ලවත්ත දුම්රිය ස්ථානය දක්වා සීමා කිරීමට නියමිතය.

ඒ අනුව 27 දින පෙරවරුවේ සිට පෙර පරිදි දුම්රිය ධාවනය සිදුකරන බව එහි වැඩිදුරටත් සඳහන් වේ.