2025 දී දකුණු කොරියාවට 1,619 ක්

2025 වර්ෂයේ ගතවූ මාස 5ට ආසන්න කාලය තුළදී දකුණු කොරියාවේ රැකියා සඳහා ශ්‍රි ලාංකික තරුණ තරුණියන් 1,619 දෙනෙකු පිටත්ව ගොස් තිබේ.

දකුණු කොරියාවේ නිශ්පාදන අංශයේ රැකියා සඳහා සුදුසුකම් ලැබූ තරුණ තරුණියන් 96 දෙනෙකු ඊයේ දින (2025.05.20) ශ්‍රි ලංකන් ගුවන් සේවයට අයත් UL 470 දරණ ගුවන් යානයෙන් පිටත්ව ගිය අතර, මෙම කණ්ඩායමට තරුණියන් 7 දෙනෙකුද අයත් වේ.

මෙම කණ්ඩායම දකුණු කොරියාවේ රැකියා හිමිවූ 910 වන කණ්ඩායමයි.

මෑත කාලීනව තරුණියන්ද දකුණු කොරියාවේ රැකියා සඳහා යොමුවීමේ වැඩි ප්‍රවණතාවයක් ඇති වී තිබෙන අතර, ඒ අනුව 2025 වර්ෂය තුළදී තරුණියන් 56 දෙනෙකු පිටත්ව ගොස් තිබේ.

ශ්‍රි ලංකා විදේශ සේවා නියුක්ති කාර්යාංශය හා දකුණු කොරියානු මානව සම්පත් සංවර්ධන ආයතනය අතර ඇති කර ගත් අවබෝධතා ගිවිසුම අනුව E-9 වීසා කාණ්ඩය යටතේ මෙම රැකියා අවස්ථා හිමිවන අතර, දකුණු කොරියාවේ නිශ්පාදන, ඉදිකිරීම්, ධීවර හා කෘෂිකාර්මික යන ක්ෂේත්‍රවල රැකියා මෙමගින් හිමිවේ.

වසර 4 මාස 10 කාලයක් දකුණු කොරියාවේ රැදී සිටීමට අවස්ථාව හිමිවන අතර, නියමිත කාලය අවසන්ව මෙරටට පැමිණෙන ශ්‍රමිකයින්ට යළි දකුණු කොරියාවට ඇතුළුවීමට අවසර හිමිවේ. ඒ අනුව ලාංකිකයින් 450 දෙනෙකු දෙවනවර (Re-entry) දකුණු කොරියාවේ රැකියා සඳහා පිටත්ව ගොස් තිබේ.

2024 වර්ෂය තුලදී ශ්‍රී ලාංකිකයින් 7,122 කු දකුණු කොරියාවේ රැකියා සඳහා පිටත්ව ගොස් තිබේ.