2020 ආණ්ඩු බලය හුවමාරුවට ශක්තිමත් බලවේගයක්

ජනාධිපතිවරණයේදී රට ඒකාධිපතිත්වය කරා ගෙන යමින් තිබූ ගමන නවතා දැමූ බවත්, අගෝස්තු 17 වැනිදායින් පසු 2020 වසරේදී ආණ්ඩු බලය හුවමාරු කර ගැනීම සඳහා ශක්තිමත් බලවේගයක් ගොඩනැගීම ආරම්භ කරන බවත් ජනතා විමුක්ති පෙරමුණ සදහන් කරයි.

ජනවාරි 08 වැනිදාට පෙර මෙරට තුළ ගොඩනැගෙමින් තිබූ දුෂ්ඨ පාලනය අවසන් කිරීමට ජනතා විමුක්ති පෙරමුණ විශාල කාර්යභාරයක් සිදුකළ බවත්, අගෝස්තු 17 වැනිදාට පාර්ලිමේන්තුවේ ශක්තිමත් බලයක් ගොඩනගා ගැනීමට ජනතා විමුක්ති පෙරමුණට බලයක් ලැබෙන බවද එම පක්ෂයේ නායක අනුර කුමාර දිසානායක මහතා සදහන් කළේය.

ගෙවාගෙන එමින් තිබෙනා ශාපකාරී දේශපාලන ගමන අවසන් කළ යුතු කාලය එළඹ තිබෙන බවත්, මේ සඳහා 2020 වසරේදී බලය ලබාගැනීමට අගෝස්තු 17 වැනිදායින් පසු රටේ පුළුල්තම මහජන ව්‍යාපාරය ගොඩනගන බවද පවසා සිටියේය.

දැන් ඇත්ත සතුරු සහ ඇත්ත මිතුරු ඉතා හොඳින් පෙළගැසෙමින් තිබෙන බවත්, ජනතා විමුක්ති පෙරමුණට ඡන්දයක් දීම අපතේ යාමක් බවටත් සමහරු සඳහන් කරන බවද හෙතෙම පැවසීය. එමෙන්ම ජනතා විමුක්ති පෙරමුණට කතිරයක් ගැසුවහොත් රාජපක්ෂ පාලනය නැවත ඇතිවිය හැකි බවටත් සමහරු පවසන බවද පක්ෂ නායකවරයා සදහන් කළේය.

මේ ආකාරයට රට තුළ නාඩගම් පණපොවන්න පටන්ගෙන තිබීම ගැන සතුටු වන බවත්,  එම ගනුදෙනුව අගෝස්තු 17 වැනිදාට බේරාගන්නා බවද ඒ මහතා පවසා සිටියේය.