සහස්දනවි සහ සොබාදනවි ගැන ආංශික අධීක්ෂණ කාරක සභාවේ අවධානය

ඉදිරියේදී වැඩ අවසන් කිරීමට නියමිත කෙරවලපිටිය සහස්දනවි ද්‍රවීකෘත ස්වාභාවික වායු (LNG) බලාගාරයට අදාළව අනුමතිය ලබාගත් කැබිනට් පත්‍රිකාවේ අන්තර්ගත මිල ගණන් වර්තමානයට ගැළපෙන පරිදි වෙනස් කිරීමේ අවශ්‍යතාව යටිතල පහසුකම් සහ උපාය මාර්ගික සංවර්ධනය පිළිබඳ ආංශික අධීක්ෂණ කාරක සභාවේදී පෙන්වා දෙන ලදී. එම මිල ගණන් සඳහා එවකට මෙම ප්‍රසම්පාදන ක්‍රියාවලිය ආරම්භවූ  2021 වසරේ පැවති ඉන්ධන මිල සහ ඩොලරයේ අගය වැනි සාධක පදනම්වී ඇති බැවින් එහි වත්මන් මිල ගණන්වල තත්ත්වය පිළිබඳව කැබිනට් මණ්ඩලය දැනුවත් කිරීමට පියවර ගන්නා ලෙස ද කාරක සභාව බලශක්ති අමාත්‍යාංශයට  දැනුම් දුන්නේය.

එම කාරක සභාව ගරු පාර්ලිමේන්තු මන්ත්‍රී එස්. එම්. මරික්කාර් මහතාගේ සභාපතිත්වයෙන් පසුගියදා (25) පාර්ලිමේන්තුවේදී රැස් වූ අවස්ථාවේදී මෙම දැනුම් දීම සිදු කෙරිණි. විපක්ෂ නායක සජිත් ප්‍රේමදාස මහතා ඇතුළු නලින් බණ්ඩාර සහ ජගත් විතාන යන පාර්ලිමේන්තු මන්ත්‍රීවරුන් ද මෙම කාරක සභා රැස්වීමට එක්ව සිටියහ. විදුලිබල සහ බලශක්ති අමාත්‍යාංශයේ ලේකම්වරයා මෙන්ම ලංකා විදුලිබල මණ්ඩලය සහ මහජන උපයෝගිතා කොමිෂන් සභාව යන ආයතන නියෝජනය කරමින් නිලධාරීහු ද මෙම අවස්ථාවට සහභාගී වූහ.

මෙහිදී විදුලිබල අමාත්‍යාංශයේ ලේකම්වරයා සහ විදුලිබල මණ්ඩලයේ නිලධාරීන් සඳහන් කළේ 2020 වසරේ කැබිනට් අනුමතිය හිමිවීමෙන් අනතුරුව ලංකා විදුලිබල මණ්ඩලය විසින් 350MW ධාරිතාවක LNG බලාගාරයක් ඉදිකිරීම සඳහා සිදුකරන ලද ජාත්‍යන්තර තරඟකාරී ලංසු තැබීමේ ක්‍රියාවලියක් මගින් විනිවිදබවකින් යුතුව මෙම සමාගම තෝරාගත් බවත්  2023 වසරේදී ව්‍යාපෘතිය ප්‍රදානය කළ බවත්ය.

LNG සහ ඩීසල් ද්විත්වයෙන් ක්‍රියාත්මක විය හැකි සොබාදනවි බලාගාරය පිළිබඳව ද මෙහිදී අවධානය යොමු විය. එම බලාගාරය තවදුරටත් ඩීසල් බලයෙන් පමණක් ක්‍රියාත්මක වීම පිළිබඳව මෙහිදී විමසීම් සිදු කෙරිණි.  මුහුදේ පාවෙන ගබඩා ක්‍රමවේදය (FSRU) හරහා වෙනම ප්‍රසම්පාදන ක්‍රියාවලියකින් සැපයුම්කරුවෙකු තෝරා  LNG බාහිරින් සැපයිය යුතු බවත් මෙහිදී නිලධාරීහු පෙන්වා දුන්හ. මේ අනුව එම කටයුතු කඩිනමින් සිදු කොට LNG මගින් මෙම බලාගාරය ක්‍රියාත්මක කිරීමේ අවශ්‍යතාව කාරක සභාව විසින් අවධාරණය කරන ලදී.

එසේම සොබාදනවි ව්‍යාපෘතිය පිළිබඳ සමාලෝචනයක යෙදී එහි අඩුපාඩු ඇත්නම් ඒවා සහස්දනවි ව්‍යාපෘතියේදී ඇති නොවන පරිදි පැහැදිළි මාර්ග සිතියමක් සකස් කිරීමේ අවශ්‍යතාව මෙහිදී විපක්ෂනායකවරයා පෙන්වා දුන්නේය.

2027 වසර අවසන් වන වන විට සහස්දනවි බලාගාරයේ මෙහෙයුම් ක්‍රියාත්මක කිරීමට නියමිත බවත් 2028 වසර අවසන් වීමට පෙර මෙම බලාගාර   LNG මගින් ක්‍රියාත්මක කළ යුතු බවට ගරු ජනාධිපතිවරයා විසින් උපදෙස් ලබා දී ඇති බව මෙහිදී නිලධාරීහු පැවසූහ.

මේ අනුව මෙම ක්‍රමවේදයන්, සැලසුම් සහ වත්මන් තත්ත්වය පිළිබඳ පැහැදිළි කෙටි වාර්තාවක් සති දෙකක් තුළ කාරක සභාවට ලබා දෙන ලෙසත් නිලධාරීන්ට කාරක සභාව විසින් දැනුම් දෙන ලදී.