වෛද්‍යවරුන්ට සේවා දිගුව ලැබෙන්නේ දෙසැම්බර් දක්වා පමණයි

රාජ්‍ය සේවයේ නියුතු විශේෂඥ වෛද්‍යවරුන් විශ්‍රාම ගැන්වීමේ වයස අවුරුදු 63 දක්වා දීර්ඝ කිරීමට ගෙන ඇති තීරණය මෙම වසරේ දෙසැම්බර් 31 වෙනිදා දක්වා පමණක් බල පැවැත්වෙන බවට නියම කර ඇත්තේ අමාත්‍ය මණ්ඩල අනුකමිටුවක් මගින් බව නීතිපතිවරයා  අභියාචනාධිකරණයට දැනුම් දුන්නේ ය

නීතිපතිවරයා  වෙනුවෙන් පෙනී සිටි අතිරේක සොලිසිටර් ජෙනරාල් ජනාධිපති නීතිඥ නෙරින් පුල්ලේ මහතා මෙම දැනුම් දීම සිදු කළේ මේ සම්බන්ධයෙන් ගොනු කොට තිබූ රිට් පෙත්සමක් සලකා බැලූ අවස්ථාවේදීය

මෙම රීට් පෙත්සම නිශ්ශංක බන්දුල කරුණාරත්න සහ චමත් මොරායස් යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ලක් හමුවේ සලකා බැලින.

නීතිපති වෙනුවෙන් පෙනී සිටි අතිරේක සොලිසිටර් ජනරාල් ජනාධිපති නීතිඥ නෙරින්පුල්ලේ මහතා කියා සිටියේ මෙම තීරණයට අදාළ ආමාත්‍ය මණ්ඩල පත්‍රිකාව අධිකරණයට ඉදිරිපත් කරන බවත් මෙවැනි තීරණයක් ගනු ලැබුයේ ආමාත්‍ය මණ්ඩල අනු කමිටුව බවත්ය

පෙත්සම්කරුවන් වෙනුවෙන් පෙනී සිටි ජනාධිපති නීතිඥවරුන් කියා සිටියේ ආමාත්‍ය මණ්ඩල අනුකමිටුවේ සාමාජිකයන් සෞඛ්‍යය ක්ෂේත්‍රයේ නොසිටි අය බවත්ය.

ඊට පිළිතුරු දෙමින් අතිරේක සොලිසිටර් ජනරාල්වරයා කියා සිටියේ මේ සම්බන්ධයෙන් අදාළ තීරණ ඉදිරි කාලයේ දී දැනුම් දෙන බවත් පෙත්සම විභාගයට ගැනීමට දින නියම කරන ලෙසත්ය

ඒ අනුව මෙම පෙත්සම ඔක්තෝබර් 20 වැනි දින විභාගයට ගැනීමට අභියාචනාධිකරණය දින නියම කළේය