විදුලි පනත සංශෝධනය නොකළානම් සේවකයන් 12000කගේ රැකියා අනතුරේ

"පසුගිය රනිල්-රාජපක්ෂ රජය විදුලිබල ක්ෂේත්‍රය පුද්ගලිකකරණ වැඩපිළිවෙලක් හරහා විශේෂයෙන්ම සේවක වරප්‍රසාද, අයිතිවාසිකම් සම්බන්ධයෙන් සැලකිල්ලක් දක්වන්නෙ නැතුව ක්‍රියාත්මක කරපු වැඩ පිළිවෙල අපි පරාජය කළා විතරක් නෙවෙයි, ආපසු හැරෙව්වා.ඒ වගේම බලශක්ති ක්ෂේත්‍රයේ රාජ්‍ය හිමිකාරීත්වය තහවුරු කළා.

රටේ සංවර්ධන ඉලක්ක සමග සමගාමීව විදුලිබල ක්ෂේත්‍රය සංවර්ධනය කරන්න අවශ්‍ය ව්‍යුහාත්මක වෙනස්කම් කරමින් 100%ක් පූර්ණ රාජ්‍ය හිමිකාරීත්වය තියෙන ආයතන පිහිටුවා අවසන්. ඒ අනුව සැළසුම් කළ පරිදි ඒ වැඩපිළිවෙල ඉදිරියට යනවා“ යනුවෙන් බලශක්ති අමාත්‍ය ඉංජිනේරු කුමාර ජයකොඩි මහතා අද (15) රජයේ ප්‍රවෘත්ති දෙපාර්තමේන්තුවේදී පැවති ප්‍රවෘත්ති සාකච්ඡාවකට එක් වෙමින් ප්‍රකාශ කළේය.

විශේෂයෙන්ම අපි වෘත්තීය සමිති සමග කළ සාකච්ඡාවේදී ලංකා විදුලි සේවක සංගමය ඇතුළු සියළු වෘත්තීය සමිති එක්ව ඉදිරිපත් කළ යෝජනා ඉතා සැලකිල්ලෙන් විමසා බලා ප්‍රායෝගික ක්‍රියාත්මක කළ හැකි ඉල්ලීම් දැනටමත් බලශක්ති අමාත්‍යංශය, විදුලිබල ප්‍රතිව්‍යහුහගත කාර්යංශය හා විදුලිබල මණ්ඩලය හැටියට ක්‍රියාත්මක කිරීම අරඹලා තියෙනවා. පූර්ණ රාජ්‍ය හිමිකාරීත්වය ඇතිව හැදෙන සමාගම් 04කට සෑම සේවකයෙක්ම අනුයුක්ත කරමින්, දැනුම්දීම දැනටම කරලා තියෙනවා. ඒ නිසා මේ සේවකයන්ගේ රැකියා සුරක්ෂිතතාවය පිළිබඳ කිසිම ගැටළුවක් මතුවෙන්නෙ නෑ.

ඒවාට සම්බන්ධ වෙන්න අකමැති සේවකයන්ට සිය කැමැත්තෙන් වන්දි ලබාගෙන විශ්‍රාම යාමේ ක්‍රමවේදයක් සකස් කරලා තියෙනවා. ඒක නීතිමය අවශ්‍යතාවයක්. එහෙම නැතුව අපට සේවකයන් ගෙදර යවන්න ඕනෙ කමක් නෑ. ඒකෙදි දැනට රටේ පවතින වන්දි සූත්‍රයට වඩා ඉහළ වන්දි ක්‍රමවේදයක් හදලා තියෙනවා. අපට සේවකයන් වටිනවා. හැමෝටම සාධාරණ ක්‍රමවේදයක් ලබා දීලා තිබුණත් සේවකයන් පොළඹවන්න පදනම් විරහිත ඒ වගේම සාධාරණ නොවන ඉල්ලීම් ඉල්ලගෙන අනවශ්‍ය ප්‍රශ්න මතුකරන බව පේනවා. සාධාරණ සහ ප්‍රායෝගික සේවක ඉල්ලීම් ඉෂ්ට කරන්න අපි කවදාවත් පසුබට වෙන්නෙ නෑ. පසුගිය කාලය පුරා අපට කරන්න පුළුවන් කළ හැකි සියළු දේවල් කළා.

ඒ වගේම මේ සංශෝධනයට නොගිහින් තිබුණා නම් අපි පනත සංශෝධනය කළේ නැත්තං රනිල්  පාලනය කාලේ තිබ්බ විදිහට තිබ්බ නම් විදුලි බල මණ්ඩලයේ 12,000ක් සේවකයන් ගෙදර යවන්න තිබුණා. ආයතන 12කට කඩන්න තිබුණා. විශේෂයෙන්ම සමහර වෘත්තීය සමිතිවලින් මම අහන්න කැමතියි ඒ වෘත්තීය සමිති වැඩ කරන්නෙ සේවකයන් වෙනුවෙන්ද එහෙම නැත්තං සේවකයන් ගෙදර යවලා ඒක දඩමීමා කරගෙන දේශපාලන ප්‍රශ්නයක් මතු කරන්නද මේ උත්සාහ කරන්නෙ කියලා. යනුවෙන්ද ඇමතිවරයා ප්‍රශ්න කළේය.

ජනතාවගේ රජයක් හැටියට අපි මේ හැම සේවකයෙකු වෙනුවෙන්ම වගකියනවා. ඒ වගේම ඒ හැම සේවකයෙකුගේම යහපත හෙට දවස වෙනුවෙන් වැඩ කරනවා. ඒ වගේම රටේ බලශක්ති ක්ෂේත්‍රයේ සුරක්ෂිතතාවය වෙනුවෙන් අවශ්‍ය හැම කටයුත්තක්ම කරනවා. සීමිත න්‍යායපත්‍රවලට අනුව නෙවෙයි. ක්ෂ්ත්‍රයේ ප්‍රගමනය පිලිබඳ පුළුල් දැක්මකින් කටයුතු කරනවා.

මෙහිදී මාධ්‍යවේදියෙකු නැගූ ගැටළුවකට පිලිතුරු දෙමින් ජනතා රජයක් හැටියට ප්‍රතිසංස්කරණ ක්‍රියාවලිය තුළදිත් කිසිම සේවකයෙකුගේ වරප්‍රසාද අහිමි කිරීමට හෝ කප්පාදු කිරීමට ක්‍රියා නොකරන බවත්, එහෙත් රජයක් හැටියට රටට අඛණ්ඩව විදුලිය සැපයුමක් ලබා දීමට බැඳී සිටින බවත් අදාළ සෑම පාර්ශවයක්ම ඒ බව වටහාගෙන ක්‍රියා කරනු ඇතැයි අපේක්ෂා කරන බවද අමාත්‍යවරයා වැඩිදුරටත් පැවසීය.

මෙම ප්‍රවෘත්ති සාකච්ඡාවට බලශක්ති අමාත්‍යංශ ලේකම් මහාචාර්ය උදයංග හේමපාල, ලංකා විදුලිබල මණ්ඩලයේ සාමාන්‍යාධිකාරී ඉංජිනේරු. ඩබ්ලිව්. එදුස්සූරිය, විදුලිබල ක්ෂේත්‍ර ප්‍රතිසංස්කරණ කාර්යාංශයේ අධ්‍යක්ෂ ජනරාල් පුබුදු නිරෝෂන් හැඩිගල්ලගේ, යන මහත්වරුන්ද සහභාගී වී අදහස් දැක්වූහ.